Nach frowen schoͤne nieman sol

Nach frowen schoͤne nieman sol·
ze vil gefragen sint sie gv̊t·
er lâsse si im gevallen wol·
vnd wisse dc er rehte tůt·
wc ob ein varwe wandel hat·
der doch der mv̊t vil hohe stat·
er ist ein vngefuͤge man·
der des an wiben niht erkennen kan·

Ich tůn ein scheiden dc mir nie·
von deheinem dinge wart so we·
vil gv̊te frúnde lasse ich hie·
nv wil ich truren iemerme·
die wile vnd ich si froͤmden mv̊s·
von der mir tête ein grůs·
noch sanfter an den herzen min·
danne ob ich ze rome keiser solte sin·

Ich gerte ie wunneklicher tage·
vns wil ein schoͤner svmer komen·
al deste senfter ist min klage·
der vogele han ich vil vernomen·
der gruͤne walt mit lǒbe stat·
ein wib mich des getroͤstet hat·
dc ich der zit geniessen sol·
nv bin ich hohes mv̊tes dc ist wol·

Ich horte gerne ein vogellin·
dc húbe wunneklichen sank·
der winter kan niht anders sin·
wan swere vnd ane mâsse lanc·
mir were lib wolt er zergan·
was gůter froͤide ich vf den svmer han·
dar gestůnt nie hoher mir der mv̊t·
dc ist ein zit dú minen ǒgen sanfte tůt·