Mit ſange wânde ich mine ſoꝛge krenken

Mit ſange wânde ich mine ſoꝛge krenken·
dar vmbe ſinge ich das ich ſi wolte lan·
ſo ich îe mere ſinge vn̄ ir ie bas gedenkē·
ſo mvgent ſi mit ſange leider niht zergan·
wā minne hat mich bꝛaht in ſolhen wan·
dem ich ſo liͤhte niht mac entwenken·
wan ich ime lange har gevolget han·

Sit das dú minne mich wolte alſuſt erē·
das ſi mich hies in dem herzen tragen·
dú mir wol mac min leit ze freuden keren·
ich wer ein gǒch wolt ich mich der entſagen·
ich wil minen kvmber ouch minne klagen·
wan dú mir kvnde das herze alſo verſeren·
dú mac mir wol ze freuden huſe geſchꝛagen·
Mich wndert wie mich min frowe twinge·
ſo ſere ſwenne ich verre von ir bin·
ſo gedenke ich mir vn̄ iſt min gedinge·
moͤhte ich ſi ſehen min ſoꝛge wer da hin·
ſo ich bi ir bin des troͤſt ſich min ſin·
vn̄ wenne des das mir wol gelinge·
alrerſt meret ſich min vngewin·

So ich bi ir bin min ſoꝛge iſt deſt mere·
alſ der ſich nahe bútet zv̊ der glv̊t·
der bꝛennet ſich von rehte harte ſere·
ir groſſú guͤte mir das ſelbe tůt·
ſwenne ich bi ir bin das toͤdet mir den mv̊t·
vn̄ ſtirbe aber rehte ſwēne ich von ir kere·
wan mich das ſehen dvnket alſo gv̊t·

IR ſchoͤnen lip han ich da voꝛ erkennet·
er tůt mir als der vledꝛamus das liet·
dú flúget dar an vntz ſi ſich gar verbꝛennet·
ir groͤſſú guͤte mich alſo verriet·
min tvmbes herze das en lie mich alſo niet·
ich en habe mich ſo verre an ſi verdennet·
das mir zeivngeſt reht alſam geſchiet·