Mir hat ein wib (Mit aufgelösten Abbreviaturen)

Mir hat ein wib·
herze vnd lib·
betwungen vnd gar verhert· |
dú ist so gv̊t·
swas si mir tv̊t·
wil si so wirde ich sanfte ernert· |
tv̊t si mir we·
doch wil ich ê·
betwungen sin von ir gewalt· |
danne ich verber·
die werden ger·
vnd ouch die sorge manicvalt· |
die si mir machet·
vnd git· |
min froͤide swachet·
iemer sit· |
swenne si nv lachet·
zaller zit·
des selde wachet·
svnder strit·
gelúkes rat·
hat in den pfat·
geleret so·
das er sol ho·
dar vffe sweben·
mit froͤiden leben·

Solde ich das sin·
so mvͤste an aller sorgen schin·
das herze min·
erhoͤhet werden svnder pin·
ich froͤide bar·
ich gedenke ie dar·
als ich getar·
wirt si gewar·
das ich so var·
ir eigen gar·
si erzeiget ir·
genade an mir·
si ist ein wib·
der ie min lib·
alleiner lebt·
vnd iemer strebt·
vf den gedinge·
vnd selchen trost·
das mir gelinge·
vnd werde erlost·
der sorgen dú mich twanc noh ie·
sit ich verlie·
den mv̊t an sie·
Min herze iach ·
sit si min ǒge alrerst er sach·
sin vngemach·
das ime sit·
bi siner zit·
beschach·
das were da hin·
vnd were ime sin·
komen vnd gewin·
des wande ǒch ich ·
nv tv̊t si mich·
gar sorgen rich·
vnd meret mine clage·
das verkeret·
vnd seret·
mine tage·
min gemv̊te·
ist worden kranc·
ich verwͤte
nah ir gvͤte·
ane allen danc·
Ie doch dar vnder·
ist ein wunder·
niht besvnder·
das ich liden·
vnd miden·
mv̊s si reine·
die ich meine·
niht ze cleine·
amme herzen·
hab ich smerzen·
vnd kumber·
ich vil tvmber·
manigen svmber·
warzv̊ wart ich ie geborn·
sol ich iemer sin verlorn·
ia hat ich si mir erkorn·
das die wunden·
vngesvnden·
mir verbunden·
solten werden·
von der werden·
nv ist min swere·
ir gar vnmere·
der ich lere·
wurde ob mir dú frowe min·
tete gv̊ten willen schin·
solde es mit ir hvlden sin·
das ich sprechen·
mvͤste zir·
was si zechen·
vnd rechen·
wolde an mir·
sicherliche ob das geschiht·
imme riche·
ist min geliche·
danne niht·
herze sinne·
minen mv̊t·
hat dú minne·
mit gewinne·
also behv̊t·
Peir der mere·
dulde swere·
dvr afriên·
sin amîen·
Von navar·
Mei von lône·
lie die krone·
vnd die sinne·
durch die minne·
drîsseg iar·
er was sorgen rich·
dc was kvmberlich·
doch vngelich·
der swere min·
die mir tv̊t schin·
von der ich dulde disen pin·
Es en stille·
ir gv̊ter wille·
in kvrzen ziten·
ane biten·
ich bin tot·
Sol min trúwe·
ane alle rúwe·
sus ein sterben·
an ir erwerben·
dest ein not·
die ich gerne dol·
vnd liden sol·
so rehte wol·
stet si mir an·
ich selic man·
so suͤsse not ich nie gewan·
Ie doh swie gerne·
ich sterben lerne·
dvr ir minneclichen lip·
owe si reine selig wib·
so denke ich doch·
das si mir noch·
gerůche geben·
ein senfter leben·
des valde ich ir die hende min·
das ane ir zúrnen mv̊sse sin·
ob ich genende·
vnd ich ir sende·
disen sanc·
ir lob ir ere·
ich gerne mêre·
in froͤmdú lant·
tv̊n ichs erkant·
mit trúwen ane valschen wanc·
wirt mir da von ein habedanc·
ich singe ir das·
ir lob noh bas·
erhoͤhet ob ichs ê· vergas·
Mine frowen·
svlt ir schowen·
in so hoher werdekeit·
das ir sol iemer sin gereit·
der eren krone·
sit vil schone·
eht aller selden seldekeit·
ir beide hende hat geleit·
ir vf ir hǒbet·
dc gelǒbet·
alle mir·
ob ir si seht·
ir verieht·
tvgende michels me von ir·
danne ich iv sage·
wand ich durch klage·
mines willen vil verbir·
min frowe ist gv̊t·
ie doch si tůt·
das wunneclichen froͤiden gir·
Mich vergat·
vnd lat·
das mir kvmberlichen stat·
wand ich pflac·
manigen dag·
das min froͤide nie gelac·
owe der dinge·
ich wenne ich ringe·
vf einen wan·
den ich han·
dem ich iemer vndertan·
wesen mv̊s·
dest mir bůs·
niemer wirdet vntz ein grůs·
mich enbindet·
sa verswindet·
vnd erwindet·
Alles klagen·
in minen tagen·
was sol ich von froͤiden sagen·
sol ich heil an ir beiagen·
swie das were·
es were zit·
alle swere·
ich gar verbere·
ob si den strit·
genedecliche·
wolde ir geben·
endeliche·
ê ich danne entwiche·
ich ir gibe das leben·
bi dem eide·
ich wil geloben·
sin enscheide·
mih von leide·
ich mv̊s ertoben·
das erwende
selig wib·
vnd sende·
mir das ende·
das min lib·
froͤide vnd minne·
vnd sinne·
von dir kúniginne·
gewinne·
dar nach ich iemer ringe·
vnd zallen ziten strebe·
vf das hoh gedinge·
ich vil dike schone lebe·
das mir an dir gelinge·
vnd enphahen mvͤsse·
svͤsser minne gebe·
wie svͤsse ich danne singe·
vnd erclinge·
swenne ich froͤliche ob allen froͤiden swebe·