Mir ſtet trǔbe vō ir zeſine

Mir ſtet trǔbe vō ir zeſine·
noch dāne lide ich bi ir pine·
dc tůt reht̾ mīne kraht·

Menig creatúre iſt plide·
dv́ bis her in ſoꝛgen was·
daſt naturlich gegen dem zide·
doch helt mich mīne in ein paſ·
ſi tv̊t mir dc ich v̾ſwine·
genade kúſche w̾de fine
vmb úch penſe ich tag vn̄ naht·
Mir ſtet trǔbe vō ir zeſine·
noch dā ne lide ich bi ir pine·
dc tůt reht̾ mīne kraht·

Maniger helt vō minnē tâle·
den noch niht twang der mīne bant·
ich wolde dc mans kande wal·
ſo wurde gůte mīne niht geſchant·
es iſt clerig leie noch begine·
ſi ǒge ſich vſſē liep zeſine·
des doch ins herze niht enaht·
Mir ſtet trǔbe vō ir zeſine·
noch dā ne lide ich bi ir pine·
dc tůt reht̾ mīne kraht·

Het ich die kvr von allē frowen·
ſon wandelt doch niht dc h̾ze mī·
ſo ſere mīne ich eine mit trowē·
dc ich ir vnd̾tan mv̊s ſin·
entzwiſchen mâſe vn̄ dem rine·
iſt kein ſchoner dāne dú mine·
ſi lit vaſt in miner gedaht·
Mir ſtet trǔbe vō ir zeſine·
noch dā ne lide ich bi ir pine·
dc tůt reht̾ mīne kraht·