Minne wc so túre dc man si mit gv̊te
[305v]
Minne wc so túre dc man si mit gv̊te
niht kvnde vergelden·
nv lat si sich vinde vil dike in dem mv̊te·
der wol stat zeschelden·
si ist worden so geile· swer sich ir wil nieten·
dem ist si veile· kan er hohe mieten·
bi selhem meile wils aber nv gebieten·
Minne wc ir frúnden zeherte· ze here·
zestrenge aller dinge·
die da wilent waren· ein hǒbt aller ir ere·
die wigt si so ringe·
stete vnd trúwe die smehet si sere·
des kvmt si in rúwe· wc ist des nv mere·
ir sitte nv́we benement ir alle ir ere·
Minne ist ir gewaldes hin hinder gedrungen·
geneiget ir eren·
die si da wolde twingen· die sint vnbetwungen·
die hohen die heren·
die hat si gebvnden· nv hant si sich dien[WS 1] banden
vaste vs entwunden· mit herzen mit handen·
wil si einen wunden der kan dc wol anden·
Do si ir spil gesellen verkeren· begvnde[WS 2]·
do wart si bekrenket·
an den alle ir ere stv̊nt zaller stvnde·
wie si den nv wenket·
ir strike die bvnden· verre vnd witen·
dc ir niht kvnden· die starken gestriten
nv ist si vber wunden· geleit an die siten·
We wc spriche ich tvmber dc minne sich lasse· verleiten mit gv̊te·
nein es ist vnminne dú vert in vnmaze
mit wankendem mv̊te·
der sten ich zevare vnd prise si kleine·
minne dú klare dú svͤze vnd dú reine·
dú ist zware vri vor allen meine·