Min erſte vn̄ ouch min leſte

Min erſte vn̄ ouch min leſte·
froͤide wc ein wib·
der ich minē lip·
bot ze dienſte iemer me·
dú hoͤhſte vn̄ ouch dú beſte·
in dem herzē min·
ſeht dc mv̊s ſi ſin·
der ich ſeltē fro beſte·
ir tůt leider we·
al min ſpꝛechē vn̄ min ſingē·
des mv̊s ich an froͤiden mich nv twingē·
vn̄ truren ſwar ich ge·

Nv ratent lieben frǒwen·
wc ich ſingen mv́ge·
ſo dc es ir túge·
ſang iſt ane froͤide kranc·
mir wart niht wan ein ſchǒwen·
vō ir vn̄ der grůs·
den ſi teilen mv̊s·
mit der w̾lte ſvnder danc·
dv́ zit iſt zekranc·
âne froͤide vn̄ ane wunne·
nv wol dar ſwer mich geleren kvnne·
dc ich ſinge ir nv́wen ſanc·

Wer ir mit mime ſange·
wol ſo ſvnge ich ir·
ſus v̾bot ſis mir·
vn̄ ir tete min ſwigē bas·
nv ſwige aber ich ze lange·
ſolde ich ſingē me·
dc tet ich als ê·
wie zimt miner frǒwen dc·
das ſi min v̾gaſ·
vn̄ v̾ſeite mir ir hulde·
owe des wie rêhte vnſanfte ich dvlde·
beide ir ſpot vnde ǒch ir haſ·

Vil wiplich wib nv wende·
mine ſende klage·
die ich tǒgen trage·
dv weiſt wol wie lānge zit·
ein ſeldenriches ende·
wirt mir dc vō dir·
ſo ſiht man an mir·
froͤide ane alle wider ſtrit·
ſit dc an dir lit·
mines h̾zen hohgemvͤte·
maht dv troͤſtē mich dvr wibes gvͤte·
ſit din troſt mir froͤide git·

Ich ſihe wol dc min frǒwe·
mir iſt vil gehas·
doch v̾ſv̊che ichs bas·
in v̾diene ir werden grůs·
des ich ir wol getrǒwe·
dc hat ſi verſwoꝛn·
ir iſt leider zoꝛn·
dc ichſ der w̾lte kv́nden mv̊ſ·
dc ich niem̾ fůs·
vō ir dienſte mich geſcheide·
es kom mîr ze liebe ald ir ze leide·
lihte wirt mir ſwere bůs·