Mich nimet iemer wnder was ein wip (Mit originalen Lettern)

Mich nimet iemer wnder was ein wip·
an mir habe erſehen·
das ir zǒber leit an minen lip·
was iſt ir geſchehen·
ſi hat ǒch ǒgen·
wie kvmet das als v́bel geſiht·
ich bin aller manne ſchoͤneſt niht·
das iſt ane lǒgen·

Habe ir ieman iht von mir gelogen·
ſo beſchǒwe mich bas·
ſi iſt an mir ſchone gar betrogen·
ſi wil anders niht wan
wie ſtat mir min hǒbet·
das eniſt nit ze wol getan·
ſi betrúget lihte ein tvmber wan·
ob ſis nit gelǒbet·

Da ſi wônt da wonēt wol tvſent man·
die vil ſchoͤner ſint·
wan das ich ein lúzel zv̊ge kan·
ſo iſt min ſchoͤne gar ein wint·
fv̊ge han ich kleine·
doch iſt ſi gemeine·
ſo das ſi vil luten ſol
iemer ſin gemeine·

Wil ſi fůge fúr die ſchoͤni nemen·
ſo iſt ſi vil wol gemv̊t·
kan ſi das ſo mv̊s ir wol gezemen·
ſwas ſi mir getv̊t·
ſo wil ich mich neigen·
vn̄ alles das ſi wil·
was bedarf ſi denne zǒbers vil·
ich bin doch ir eigen·

Lat v́ch ſagen· wie es vmbe ir zǒber ſtat·
des ſi wnder treit·
ſi iſt ein wip dv́ ſchoͤne vn̄ ere hat·
da bi liep vn̄ leit·
das ſi iht anders kvnne·
das ſol man gar verheln·
wan das ir wnnekliches leben·
machet ſoꝛge vn̄ wnne das iſt ir leben·