Mich lat mis herzen kúniginne

Mich lat mis herzen kúniginne·
truren vnd krenket mir die sinne·
an ir trost mag ich niht wol genesen·
ich kan vngemvͤte niht entwichen·
swc ich sage es welle an mir gerichen·
dis vnbilde solten vrowen lesen·
swie aber ich ir guͤte noh befvnde·
dc mir wurde ein kússen von ir mvnde·
davon vngemvͤte mir verswunde·
von der liebe moͤht ich in froͤiden wesen·

Ich wil werben iemer vmb ir hulde·
miner frowen swie kvmme ich verdulde·
solhen kvmber den ich von ir trage·
si kan minem herzen niht entwenken·
mit ir froͤmde es mvͤsse an si gedenken·
dc beste ich iemer von ir tvgenden sage·
des hat sich min herze gen ir vermessen·
swie si hat mit sorgen mich bebessen^{[WS 1]}·
dc ich miner froͤiden habe vergessen·
ane trost lat mich dú liebe in klage·

Ach minne wie du minen kumber merest
herze ich volge dir sam du mich lerest
davon ist mir sende sorge kunt·
die ich tǒgen trage vnuerborgen·
mangen tag den abent vnd den morgen·
bin ich von der minneklichen wunt·
o we si lat mich in den sorgen alten·
davon min herze mv̊s so dike erkalten
ich moͤte minen dienst han behalten·
das mich troste danne ir roter munt·

Anmerkungen (Wikisource)

1. Vorlage: bessen.