Meye bis vns willekomen

Meye bis vns willekomen·
sit dv truren hast benomen·
manigem dc den winter her mit sorgen hat gerungen·
dem walde ist wol gelvngen·
er stet also besvngen·

Dirre mere bin ich fro·
sprach ein geilú maget do·
wer sol mir nv wenden ob ich ge nach blv̊men swanze·
het ich der zeinem kranze·
so zeme ich an dem tanze·

Tohter la din swanzen sin·
volge nach der lere min·
mich bedvnket dc din mv̊t tobe sere nach der minne·
dvn hast niht gv̊ter sinne·
da von belib hie inne·

Nv sihe ich wol ir hvͤtent min·
sit ich sol hie bi iv sin·
wissent doch sit ich es weis so kvmtz ú niht zegv̊te·
verlorn ist úwer hůte·
so sprach dv́ wolgemv̊te·

Sol min hůte sin verlorn·
dest mir wol von schulden zorn·
volge mit dvr dine from vnd hvͤte dich vor der wiegen·
die man die kvnnen liegen·
da von la dich niht triegen·

IN hv̊te min vor der wiegen niht·
swc halt mir da von beschiht·
dem ich holdes herze trage dem mv̊s an mir gelingen·
er kan wol swere ringen·
ich wil im froͤide bringen·

Dv froͤwest in vnd beswerest dich·
tohter lâsse es noch dvrh mich·
nein ich mv̊ter ir hant vch versv̂met an dem rate·
es ist nv ze spâte·
hin spranc dú ivnge drâte·