Meie dîn zit (Mit aufgelösten Abbreviaturen)

Meie dîn zit·
maniger leige wunne vns git·
vf berge in tal in ǒwen·
die der leide winter twang·
dú heide lit·
wol gezieret svnder strit·
in gruͤne mag man schǒwen·
blv̊men bla brvn rot gel blank
gar zergangen ist des winters grimme^{[WS 1]}·
dú nahtegal·
schellet aber svͤzen schal·
in froͤide gebender stime·
dú noh nie so sv̊ze erhal·

Seht an den walt·
wie gelǒb wie wol gestalt·
luft wasser erde ervrischet·
fúr in svnnen hoh geschaft·
wie manigvalt·
blv̊t vnd blůmen vngezalt^{[WS 2]}·
mit varwe in varwe mischet·
des vil lieben svmers kraft·
ist iht vroͤide me bi disen wunnen·
ia megde wib·
zieret iarlank wol ir lib·
so si danne beste kvnnen·
froͤide truren da vertrib^{[WS 3]}·

Wib reiner nam·
minne^{[WS 4]} zuht kúsche vnd scham·
so wirdest dv gebluͤmet·
bas danne swc der meie ie bot·
ma tv̊nt alsam
holt sint eren schanden gram·
so werdet ir ǒch geruͤmet
vúr gesteine in golde rot·
manlich man vnd wiblich wib gesellet·
ist besser iht
vf der erden sprechent niht·
ist ir mv̊t so gestellet·
dc si hant zetvgeden pfliht·

Anmerkungen (Wikisource)

1. Vorlage: grīmē.
2. Vorlage: vn̄ gezalt.
3. Vorlage: v̾tribt.
4. Vorlage: mīnet.