Maria mv̊ter vnd meit der sv́nder troͤsterin

Maria mv̊ter vnd meit der sv́nder troͤsterin·^{[WS 1]}
aller heiligen frowe vnd in himel kúnigin·
din schoͤne git dem throne glast·
also dc in din schoͤne vber schoͤnet·
da ist froͤide ân ende vnd ân ort dú niemer me zergat·
da got vnd sin mv̊ter sitzent in ir maiestat·
ich wolte gerne sin ein gast·
da iegelich engel lob zelobe doͤnet·
sant michahel der singet vôr
kristems lob dc es in dem throne erhillet·
sam tv̊nt engel in ir kôr·
dc alles himelsches her in den froͤiden schillet·
da tvsent iar noch kvrzer sint danne hie ein stúndelin·
die genade hant si von gotte vnd dar zv̊ von der lieben mv̊ter sin·

Got helfe mir dc minú kinder niemer werden alt·
sit dc es in der werlte ist so iemerlich gestalt·
wie stet es vber drisseg iar
sit man die pfaffen siht so sere striten·
sagt mir der bâbst von rome· wc sol ú der krvmbe stab·
den got dem gv̊ten sant peter vns zenbinden gab·
stol vnd infel gab er dar·
das er vns erloste von sv́nden zallen ziten·
nv sin die stole worden swert·
die vehtent niht nach selen nv́wan nach golde·
wer hat úch bischof dc geleret·
dc ir vnder helme ritent da dú infel svͤnen solde·
úwer krumber stab der ist gewahsen zeinem langen sper·
die werlt habt ir betwungen gar úwer mv̊t stet anders niht wan gib eht her·

Anmerkungen (Wikisource)

1. Links neben der Spalte von alter Hand alt stolle.