Maria mv̊ter vnd meit
[410v]
Maria mv̊ter vnd meit·
dv hast den hohsten pris beieit·
der tugende keiserinne·
dv svͤze ob aller svͤssekeit·
din svͤze ist al der werlde bereit·
heilberndv́ kv́niginne·
dv zederbǒm dv balsem smak·
du richú lilien ǒwe
dv himelstraze dv selden tag·
gote liebú spiegel schǒwe·
Dich lobent die schv̊le in mvsica·
vnd dú svͤzen cantica·
der tvgenden keiserinne·
dih lobent dú psalteria·
die schellen vnd dú organa·
heilberndú kv́niginne·
dv olbǒm ast dv mvscat nvs·
dv drivaltig sagerere·
dv svnnenglast dv minne schus·
von dir sint svͤze mêre·
Dv lieht ob al der werlde lieht·
die sternen sich dir gelichen nieht·
der tvgende keiserinne·
das dv bist also minnenvar·
des wunnet al der engel schar·
heilberndú kv́niginne·
dv seiten klang dv fúrsten stv̊l·
dv hoh swebendú krone·
dv himel sang· dv tvgenden schv̊l·
dv zimst wol kúniges trone·
Dv edlú tohter von sýon·
dich mant dc her von babilon·
der tvgende keiserinne·
erloͤ̂s vns dc verstanden pfant·
dc get dem túuel in die hant·
heilberndú kúniginnen·
dv wunnentanz dv lieht aurore·
dv vollen svͤnerinne·
dv rosen kranz· dv froͤiden kore·
din lob git hohe sinne·
Dv edelú gerte von ýesse·
der nie niht wart gelichet me·
der tvgende keiserinne·
dv hast gewahsen vber den luft·
gewurzet in der witzen kruft·
heilberndú kúniginne·
dv vridestat dv froͤidental·
du spilndú bluͤndú heide·
dv himelpfat des herzen schal·
der engel ǒgenweide·
Dv werdú gebvrt von nazareth·
der rat an dir alleine stet·
der tvgende keiserinne[WS 1]·
dc vns dú helle iht werde kvnt·
dc wende der din wol redender mvnt·
Heilberndv́ kv́niginne·
dv ankerhaft·
dv segel wint·
dv liehter sterne dýane·
dv magen kraft dv selden kint·
dv hoher trimontane·
Genaden wůcher voller bǒm·
genaden vber laden ein sǒm·
der tvgende keiserinne[WS 2]·
genaden vber flússig vas·
er milter schenke der dich mas·
heilberndv́ kv́niginne·
dv wolken dvs·
dv mirren trǒf·
dv bisme richú krame·
dv honeges flus dv sternen lǒf·
dv froͤidebernder same·