Man sol hoͤren suͤsses singen in dien ǒwen vberal
[47r]
Man sol hoͤren suͤsses singen in dien ǒwen vberal
lobelichen sang erklingen·
svnder von der nahtegal schowent vf den anger breit·
vnd ǒch an der liehten heide·
wie schone si sich mit ir kleide
gen dem meien hat bekleit·
Maniger hande bluͤmelin·
lachent vs des meien tǒwe·
gen der liehten svnnen schin·
dú zit ist in werder schǒwe·
was sol troͤsten mir den můt·
sit mich twinget herzen swere·
bi der ich vil gerne were
dc dú mir niht gnade tůt·
Ach vil minneklichú guͤte·
enbinde mich von sender not·
la mich niht vs din hůte·
ald ich bin an froͤiden tot· ich sol diner helfe gern
last dv min herze vs din̾ pfliht·
so kan mich getroͤsten niht·
dvn wellest mich genade wern·
Gewalt noh mangem angesiget·
dc hoͤret man die wisen iehen·
da man genade niht enpfliget·
dc solm an min̾ frowen spehen
dú ist gar gewaltig min· an genade dú vil gůte·
lat mich truren in vnmv̊ten
mv̊s ich an min ende sin·
Minne dv solt sin gemeine·
ald ich bin an froͤiden tot·
fuͤge dc mich lieplich meine·
der vil liebvn múndel rot· sit du bist gewaltig min·
vnd leitest mine sinne·
swie dv wilt ach werdiv minne·
so solt ǒch ir gewaltig sin·