Klingesor von Vngerlant (Hie kriegent mit sange)
[219v]
Hie kriegent mit sange· Hˢ walther von der vogilweide· Hˢ wolfran von Eschilbach· Hˢ Reiman der Alte· der tugendhafte schriber· Heinrich von Oftertingen vnd Klingesor von Vngerlant·
[220r]
von Oftertingen·
Das erste singen nv hie tůt·
heinrich von oftertingen in des edeln fúrsten don·
von dúringen lant der teilt vns ie sin gv̊t·
vnd wir im gotes lon·
der meister gat in kreises zil·
gegen allen singern die nv leben er vf geworfen hat·
die benennet er si wening oder vil·
alsam ein kenpfe er stat·
nv hoͤrent wer des kampfes kan gegen allen meistern pflegen·
des fúrsten tvgent vs oͤsterrich wil er vf die wage legen·
ob si im die nv wider wegen·
mit drier fúrsten milte die hohsten die si haben megen·
hant die alle nv so hohen pris an tvgenden leben·
in diebes wis
wil er sich des gevangen húte geben·
her walther·
Nv hebet sich mit schirmenslegen·
walther von der vogelweide so bin ich genant·
vnbilde wil an mir den zorn erwegen·
dc oͤsterrich dc lant·
vnd ich zehasse sin gedingen
dar zv̊ die werden dienestman ir gvnst ich iemer hol·
des edeln fúrsten si von mir verzigen
ê ich vmbilde dol·
morgen las ich schowen wer nv si der edel degen·
dem alle fúrsten mv̊ssen geben dvr sine tvgende wich·
von frankrich wil ich dar wegen·
der kúnic hat me prises danne der edel vs oͤsterrich·
swer hie enpfahet sigelosen teil·
dc ist min ger·
dc wid vnd seil·
im schaffen balde ein haher morgen her·
der Schriber·
Her walther lât in talanc vri·
ich tugenthafter schriber tritte im zv̊ mit sanges gir·
wie moͤhte ein fúrste werder sin danne dri·
nv sagent meister mir·
mit sange sine besten tvgent·
wie er nah gottes hulde werbe vnd doch zerwerlte var·
der dúringe herre ist milte vs kindes ivgent·
ob ime ein adelar·
zallen ziten ist mit hohen flúgen her gewesen·
dar zv̊ hat er gegen vienden wol des edeln lewen mv̊t·
alexandern han ich gelesen·
dem kúnige er an sinem orden wol geliche tůt·
sin milte rich vnd ǒch die armen froͤwet·
sin loͤwen mv̊t·
die manheit tv̊t·
er ist vor allen kúnigen vnbetroͤwet·
von Oftertingen·
Wa nv grieswarten kampf ist komen·
ich bin des kempfe vs oͤsterrich vnd kan die widerslege·
zwene meister hant sich angenomen·
dc nieman gegen in mege·
mit sange so ist ir vrage scharpf·
swie doch ir eteslichem volgen svͤsse sprúche mitte·
Reimar von zweter sit ich din bedarf·
hoͤre zv̊ nah trúwen sitte·
von eschelbach der wise sol der ander kieser wesen·
so sin wir beidenthalben wol gewaltes vor in fri·
dc reht helfe mir genesen·
wan es sich nie von im geschiet der hat die namen dri·
her fúrste heissent kiesen vf irn eide·
swer singen wil in todes zil·
entwichent niht dvrh liebe noch dvr leide·
von Oftertingen·
IR herren hoͤrent mich ein teil·
des fúrsten tvgent vs oͤsterriche die wil ich úch zeln·
swen er wol getůt so wirt er geil·
got kvnde in selbe weln·
wand er dekeine tvgent verbirt·
vnd doch nach gotes hulde vaste an dirre werlte strebet·
ein krone im dort in himelriche wirt·
nach priesters lere er lebet·
wib sint sines herzen spil· den git er senften grůs·
er eret alle megede dur die maget die got gebar·
den klagenden tůt er kvmber bv̊s
swc wiser man erdenken kan die tvgent hat er gar·
er haltet ǒch gegen kúnige wol sin zil
er ist ein kint·
an wizen blint·
swer fúrsten dri gegen ime prisen wil·
der Schriber
Siben fúrsten sint des wert·
des ein roͤmesch kv́nic enist zeweln benant·
die enkiesent niht wan swes der edel gert
herman von dúringen lant·
ist danne der kúnic ze kvrz ze lanc·
dc er dem riche vnd ǒch der werlte niht schaffet froͤiden vil·
der dv́ringe herre nimt es im svnder danc·
vnd setzet swen er wil·
dc sahent ir an keiser otten da von brúnswic·
den schiet er von dem riche er tet in maniger eren fri·
heinrich von ofteringen swic·
vnd prise gegen ein ander niht dc vngeliche si·
swelh leit hvnt ie sv̊hte vnrehte vart
des sint gemant·
ein strafen im wart·
bi miner zit von sines meisters hant·
von Oftertingen·
Her schriber ir der kvnst niht hant·
dc ir min meister mv́gent sin· als úwer mvnt veriach·
reimar von zweter si darzv̊ benant·
vnd der von eschelbach·
[220v] her walther den ich gester sach·
swc meister ist in tútschen landen hie vnd anderswa·
ein kreie zv̊ eim edeln valken sprach
her gugguc sint ir da·
der selben kreien hant ir an mir wol getan gelich
her schriber[WS 1] do ir von dem leit hvnde kvndet sagen·
ich bin úch doch zekv́nste rich·
ia mvͤssent ir in welfes wis an widerverte iagen·
min tihten ist von meisterkv́nsten sleht·
ich wil úch wern·
růpreht min kneht
mv̊s úwer har gelich den tôren schern·
schriber
Nv wirt gesvngen ane vride·
swie úwer kneht min reides har gelich den toren scher·
her walther koment balde mit der wide·
den haher bringent her·
so erzeige ich was min kvnst vermac·
dc mvͤssen an mir schowen beide frowen vnd man·
swenne ich gesinge disen ganzen tac·
alrerst so heb ich an·
ia enwirt iv niemer kunt von oͤsterrich des fúrsten grůs·
nv hoͤret wie vnser singen ist mit worten vs geleit·
von ýsenache stempfel mv̊s
ob vns nv beiden stan· alhie mit sinem swerte breit·
er rihte ab vnser eime in rǒbes sitte·
dem man valles iehe·
der anders bitte·
dem wúnsche ich dc im herzeleit geschehe·
Oftertingen
Ja von dem fůs vnz vf den gebel·
lobt nv dú werlt den reine werden helt vs oͤsterrich·
alle werlt den reine werden helt vs oͤsterrich·
alle fúrsten sint gegen im ein nebel·
wan er ist dem svnnen gelich·
welt ir úch lassen tv̊n bekant·
wes pfliget der milte vs oͤsterrich· des ist sin ere breit·
swelhem edeln man er git gewant·
des wib wirt ǒch bekleit·
den frowen sendet er zehvs mit siner milten hant·
dc sú mit eren sprechen mac dis gab der fúrste riche·
her schriber sv̊chent ellú lant·
wa vindet fúrsten dri die siner tvgent werent geliche·
min meisters kvnst git iv den vierden ǒch
von der besten kúr·
ir tvmber gǒch
nv bringet hieher lop mit rehte fúr·
schriber
Ein milte ist hohen eren gelich·
als der von oftertinge sprichet vmb der[WS 2] frowen war·
sin tvgent der vil edel vs oͤsterrich·
von der dúringe herre hat·
der fúrste vs dúringen hat erstrebet·
dc aller pris bi im behuset ist von kindes ivgent·
swas kv́nige in al der kristenheite lebet·
die hant von im ir tvgent·
er loͤschet mange schande· sam der priester sv́nde tůt·
swenne der den sv́nder in der rehten rúwe siht·
zv̊zim so flusset herren blůt[WS 3]·
den gernden tůt er kvmbers bv̊s· als mir dú menige giht·
ir reinen frowen vs der dúringer lant·
der mich hies gǒch·
es were genant
von mir sin mv̊ter dvrh sich lasse ich dc ǒch·
von Oftertingen·
Der dúriger herre ist vs der ivgent·
erwahsen so dc sine landes fúrsten gebent im wich·
er gewinnet niemer doch so hohe tvgent·
als der vs oͤsterrich·
alle mine vinger wellent swern·
dc sin vil reines herze niht wan denket alle tage·
wie er mv́ge dort die sele ernern·
vnd hie der werlte behage·
wan siht in oͤsterriche zv̊ den edeln fúrsten varn·
vil manigen sende gernden man den tůt er kvmbers fri·
alsam dú bin zv̊ den karn·
mit froͤiden vallent ob ir rechet wie sis drinne si·
ich wil dc stenpfel niemer me gesparn·
dc leben min·
ein adelar
si so andern mvͤssen valken sin·
her Biterolf·
ICh bitterolf mv̊s iezvnt dar·
der zorn wil langer swigen niht· her schriber dagent mir·
ich sihe ein âs vor mir der húte bar·
vnd kom in rappen gir·
ein kater duhte sich so zart·
dc er die svnnen frijen wolte so si fruͤge vf gienc·
vnd nam doch sit nach siner rehten art·
ein tier dc mv́se vienc·
ein tvmber sties der pfannen stil ins venster an dem tor·
dv́ schůffe moht niht hin mitte nv merkent wies geschach·
dc breite ist alles noch hie vor·
walther Reimar ir aller meister der von eschelbach
min kvnst lat ǒch wol schowen wc ich kan·
an disem tage·
dich tvmber man·
heinrich von oftertingen oder trage·
von Oftertingen·
Bitterolf ich sage dir
min bispel noch min singen dvr din troͤwen niht verbirt·
swa mv́se loufent eine katzen an·
ob dú erbissen wirt
so mv̊s der mv́sen sin gar vil·
ir tvmben [221r] singer tv̊nt den kleinen tiern an mir gelich·
so sten ich alles in der katzen zil·
vnd bîsse alvmbe mich·
io het ich zv̊ der dv́ringe herren selbe wol die pfliht·
dc kúnic noch keiser niht so rehte werdekliche lebt·
wêre der vs oͤsterrich niht
des tvgent ob allen fúrsten in so hoher wirde swebt·
swer den edeln fúrsten an gesiht·
vs oͤsterrich·
dv́ menge giht·
sin milte tvgent si dem adelar gelich·
Biterolf·
Stempfel drit vns naher bi·
so mvͤsse ich nv erstochen werden in eines diebes zil·
vinde ich niht einen graven wandels fri·
als ich es bescheiden wil·
wer wc zemegenze da geschach·
dc man den fůlder fúrsten wolte krenken hohes reht·
der dv́ringe herre den stv̊ll von koͤlne brach·
vnd mahte krvmbe sleht·
da wc vil manic werder degen die hatten grossen zorn·
da wurden tvsent swert geruket an der selben stat·
von hennenberc der hohgeborn·
in eines lewen mv̊te er fúr der dúringer herren trat·
von stahel ein beggel hube wart gezoget
des tages genv̊g·
den edeln voget
man toten da hin fúr den keisˢ trůg·
her Biterolf·
Mag ere bi der manheit sin·
scham vnd milte trúwe dc erbarmvnge in gestat·
von dúringen landes herre stêt mir bi·
dc er dis alles hat·
da gabent genv̊ge fúrsten wich·
do trat er fúr der dv́ringer herren in eines draken kúr·
das sach der edel helt vs oͤsterrich·
her heinrich bringet fúr·
wa hat der edel vs oͤsterrich so hohe pris getan·
als der hennenberger dort vor dem von divringen lant·
lât in vor dem edelen stan·
es were dem berner genv̊c gewesen do in herre egge vant·
der fúrste sprach ia hat er wol den mv̊t·
dc drisseg lant
vnd alle ir gv̊t·
zesinem ellen weren wol bewant·
von Oftertingen·
Ich wil der dúringer herren geben·
zehelfe den von brandenburg den hennenberger dort·
kvnde der von oͤsterrich niht schoner leben·
so tů mich stempfel mort·
got im noch ǒgen zwei bescher·
in sinen nac vnd hende zwo dc were des herzen leben·
swenne er sich mit den zwein gegen den vîenden wer·
dc zwo den varnden geben·
do man der vnger kúnic in hasse gegen den fúrsten sach·
den schilt er zů dem arme warf· mit ellenthafter hant
zv̊ sîme kamerere er sprach·
nv schaffe dc der gernden diet erloͤset sin dú pfant·
si mvͤssent herre tugende sich verstan·
die singens pflegent·
al svnder wan·
si tôrn die drîe fúrsten gegen im wegent·
her Reimar·
Ein fúrstin vnd ir frowen sint·
vns beiden alzenahe bi dc wirt von mir geklaget·
vor zorne mv̊s ich zabeln als ein kint·
dem man dc ei versaget·
dines schalles ist nv gar zevil·
heinrich von oftertingen Reimar wil din vient wesen·
wan swer sich selben dankes toͤten wil·
wer hulfe dem genesen·
ia mac der edel vs oͤsterrich der tvgende niht getragen·
als dúringer herre nv vor allen fúrsten hat·
swer vberledet sinen wagen·
der brichet lihte din sanc vs eines tôren mvnde gat·
swenne alle fúrsten hten engel namen·
al svnder spot·
vnd ane schamen·
so were der dv́ringer herre wol ir got·
Von Oftertingen·
Reimar[WS 4] vernim wes ich dich mane·
dis bispel dine tvmpheit dur din droͤwen niht verbirt·
swa mv́se lǒfent eine katzen ane·
ob dú dur bissen wirt·
da mv̊s der mv́se sin gar vil·
ir tvmben singer tv̊nt den kleinen tierlin wol gelich·
so sten ich alles in der katzen zil·
vnd bisse alvmbe mich·
so het ich zv̊ der dúringer herren selbe wol die pfliht·
dc kv́nic noch fúrste vf erde niht so werdekliche lebt·
were der vs oͤsterriche niht·
des tugent in den lúften ob al der werlte swebt·
swie man des lip hie vf der erden sihet·
von oͤsterrich
dú werlt mir giht
sin tugent stige eime adelarn gelich·
von Eschelbach
Heinrich von oftertingen sage·
weistú wie got den túfel dvrh sin vbermv̊te bant·
sol ich dich binden dc ist mines herzen klage·
in miner herren lant·
von eschelbach ich wolfram
ob dv beheftet bist mv̊s bannen dich in priesters wis·
mir weren alle frowen drvmbe gram
lies ich dir sanges pris·
der dúringer herre wolte ich han fúr [221v] maniger kúnige leben·
got gab in allen fúrsten dc si bilde bi im nemen·
die hie nach wirde kvnnen streben·
vnd dort nach gotes hulden ringen· vnd hie der werlte gezemen·
heinrich von oftertingen tů den segen·
la ir sin gach
vil hagels regen·
zoget dir mit donres bliken von mir nach·
von oftertingen·
Her terramer sit willekomen·
io dringet mich dú heidenschaft mit manig krîe don·
noch húte wirt ein sturn von mir vernomen·
dc der von arbon·
gewalteklich nie gehielt·
do er der heiden vil verschriet als im dú menge iach·
vf alischantz er genv̊c der helme spielt·
vnd lanzen vil zerbrach·
ein frosch vs svͤssem tǒwe spranc in eine heisse glůt·
vnkv́nde foͤrhte mvͤient manigen der si sv̊chen wil·
dem froͤsche ir wol geliche tůt·
ir woltent sv̊chen furt an mir des ist úch gar zevil·
walther Reimar der schriber bitterolf·
hant gense wan
so sú den wolf
erkennent vnd wellent vs den zúnen gan·
Her walther von der vogel·
Ich walther kvme in sanges klage·
heinrich von oftertingen sage wie hast dvs gedaht·
dc ich dir dinen vbermv̊t vertrage·
der mich in zorn hat braht·
min zvnge wc ein teil zesnel·
dc ich mich des von oͤsterrich hate gar verzigen·
dc si verswellen mvͤsse vnd ǒch dú kel·
wil zorn an mir gesigen·
ich han getan rehte als der vons túfels rate slant·
den iapfel vnd wc doch niht des mv̊tes sinewel·
dc wort ich niemer me veruant·
moͤht ichs ergriten sam dc obs ich breche es vs der kel·
vil hohgelopter edelr fúrste wert·
von oͤsterrich
min krie gert·
verkús nach gotes orden wider mich·
dis sanc her walther ein teil· vnd entwúrte im der von oftertingen in dem selben liede·
her walther·
Ein kvnic vnd zwene fúrsten rich·
sint vs genomen so pruͤue ich alle die werlt zv̊ sterne glast·
die besten sint dem morgen sternen gelich·
swenne der ie frůge vf brast·
ich enmac es langer niht verdagen·
der zweier fúrsten einer wol der svnnen gelich hat·
div die truͤben wolken kan veriagen·
als si gar luter stat·
heinrich von oftertingen sage wer mac der edel sin·
des tvgent vor allen fúrsten kan der svnnen geliche wesen·
von oͤsterrich der herre min·
von siner milte wirt noch vil gesvngen vnd gelesen·
nv hoͤrent ob ich in rehte messen kan·
alswa er gat·
loͤwe vnd man·
der zweier herze vnd erbarmvnge er hat·
her walther von der vogel·
Ja mv̊s der tac me prises han·
danne svnne sterne oder mâne als ichs bescheiden wil·
des mvͤssen hohe pfaffen mir gestan·
vnd wiser leigen vil·
mac ich gezúge niht entwesen·
so sv̊che ich werde meister wise hie vnd anders wa·
ich meine die die biblien hant gelesen·
des landes cronica·
ir edeln dúringe hessen franken swabe lânt úch sagen·
wer mac der fúrste sin· der al der werlte ist vber gelich·
der dúringer herre kan vns tagen·
so get im nach ein svnnen schin· der edel vs oͤsterrich·
der tac die werlt wilde vnd zam erfroͤwet
dast wol bekant·
mit froͤide stroͤwet
er vns sin gůt· herman vs dúringen lant·
von oftertingen·
Heinrich von oftertingen klaget·
dc man im lege in dúringen vngeliche wúrfel fúr·
walther mit valsche pris an mir beiaget·
dast niht nach trúwen kúr·
ê der von oͤsterrich gê·
dekeinem fúrsten nach· swie er zer svnnen si benant·
ich beite din vnd werest vber se·
klinsor vs vnger lant·
ich mv̊s an dich beruͤfen vnd kan dich vs erweln·
din meisters kvnst vor allen singern nv ist vs erkorn·
ob du des mers gries solt zeln·
vnd alle sternen svnder nennen· ich bin vnu̾lorn·
ich wil in sv̊chen dast nv min ger
in vngerlant·
klinsore mv̊s her·
dem ist dv́ tvgent in oͤsterrich erkant·
von eschelbach·
Wir meister wolten sinen tot·
vil ofte stempfel wart genant er solt bereitet wesen·
dú fúrstin sprach swem ich min hant ie bot·
der lât in wol genesen·
walther her schriber lat úch sagen·
ob ich mit gabe ie wc fúr kumber úwer keines tach·
so svlt ir úwern zorn durch mich verdagen·
sit es vor mir geschach·
die keiser sprachen frowe an vns geschiht al úwer ger·
[222r] ia waren vnser sinne ie zaller zit an úch gewant·
lât in den klinsor bringen her
es wirt vil lihte lanc ê er in vinde in vnger lant·
sú sprachent lant in varn dar nach erstat·
in disem zil·
fúr megenze gat·
die wile des claren rines vil·
hie ist Clinsor komen vnd singet er vnd der von eschelbach wider ein ander· vnd vahet das Clinsor an· vnd singet diu drú lieder div hie nach geschriben stant·
Ein vater sinem kinde rief·
vor eines sewes tamme lag es vnd slief·
nv wache kint· ia weke ich dich durh trúwe·
disen se den tribet wint·
so kvmt dú naht gar vinster wache liebes kint·
verlúre ich dich so wirt min iamer núwe·
dannoch dc kint des slafes pflag hoͤrent wie der vater tete·
er sleich hin naher da es lac·
mit siner hant gab er im einen besmen slac·
er sprach nv wache kint es wirt ze spete·
klingsor·
Dem vater wart von schulden zorn·
vs sinem mvnde erschalt er do ein helles horn·
er sprach nv wache noch ein tvmber tôre·
da von sin zorn im wol gezam·
dc kint er bi sim reiden valwen hare nam·
er gab im einen baggen slac ans ore·
er sprach din herze ist dir vermoset ich mv̊s mih din enziehen·
kan dich min horn niht fúr getragen·
vnd ǒch der besme da mit ich dich habe geslagen·
noch hilf ich dir wilt dv dem wage enpfliehen·
klingsor·
Clinsor vs vngerlant mir iach·
der vater wider zv̊ dem lieben kinde sach·
mit iamer er dv́ ǒgen gegen im wante·
da von wart sin gemvͤte scharf·
mit einem slegel er zv̊ dem lieben kinde warf·
er sprach nim war den botten ich dir sante·
ezýdemon ein ter din pflac dc wc gar svnder galle·
da fúr nêm dv eins luhses rât·
der dich in disen valschen slaf gedrungen hat·
svs brach der tam vnd kan der se mit schalle·
von eschelbach[WS 5]
Clinsor ich loͤse dir die knotten·
nv dol dc wiser meister dvr die zwelf botten·
ob ich in dines sinnes sêwe iht schepfe·
verwirre ich mich in disem hamen·
din strafen wil ich dvlden meister svnder schamen·
nv lache ob mich min tvmpheit hie beklepfe·
ich sage dir wer den kinde rief altissimvs der starke·
ein ieglich sv́nder ist das kint·
gotes horn die wisen meister pfaffen sint·
svs swebt in diner kv́nste se min arke·
klingsor·
Ja meister loͤse vns bas den haft·
dc git der werlte maniger selden hohe kraft·
swer es merken wil der lâsset mange sv́nde·
min sin was al der werlte zetief·
en dc mir von oftertingen heinrich rief·
nv vindest dv die hoͤhe vnd ǒch die grúnde·
drú tusent marc in vngerlant die han ich von den richen·
welle ich die habe vor dir sparn·
wilt dv mit mir gegen siben búrgen varn·
so mvͤsse got an selden mir geswichen·
Eschelbach·
Sint mir die sinne in herzen zam·
so wil ich dir bescheiden von des sewes tam·
dc ist ein zit dc dir got hat gesprochen·
verwúrkest aber dv dú zit·
gelǒbe mir an aller slahte wider strit·
so hast dv selber dir den tam zerbrochen·
der sê sint dinú komenden iar din tage· dc sint die winde·
din engel ist ezýdemon·
der luhs den tiefel tútet der dir svren lon·
kan geben svs wen ich dine rîme ich vinde·
Eschelbach
Nv hoͤre ob ich iht kvnne spehen·
den besmen slag got lât an frúnden dir beschehen·
grôs herzeleit das ist sin erstes strafen·
wirstv an besserunge schiech·
den baggen slac den merke dv wirst selber siech·
wiltv zelange in dinen sv́nden slafen·
des slegels wurf dc ist der tot den er danne an dich sendet·
rúwe vnd bihte er von dir gert·
wirt er der beider vollekliche niht gewert·
din helle pin ist iemer vnverendet·
klingsor
Ein kúnic der hat liebe kint·
ivncfroͤwelin vor ivgent si niht gekroͤnet sint·
vnd wirt in hohe krone doh gemessen·
zwei mannes bilde er da gesach·
ze rehter ê er im der schoͤnen kinde iach·
er sprach ich wil mih gegen úch niht vergessen·
úch vnd úwer frúndin ich bi zwenzer wochen kroͤne·
dc ir alleine krone traget·
vf hǒbten zwein swer [222v] mir dis froͤmde wunder saget·
der dunket mich an meisters kúnsten schoͤne·
klingsor·
Der eine frúnt gewan den sin·
dc er tet der sinen schoͤnen frúndelin·
gros herzeleit vnd manige iamers pine·
er slůg an si mit dornen scharpf·
vnder sine fuͤsse er si vil ofte warf·
vnd soldes in dem pfv̊le bi dem swine·
dc sach der kúnig zeiner zit der in die krone here·
gab des mv̊st im zorn gezemen·
er sprach zehant ich mv̊s mich úwer beider schemen·
min ǒgen svlnt úch sehen niemer mere·
klingsor
Dú ander magt leit grosse not·
von ir friedel ofte ir ǒgen wurden rot·
nv merke wiser meister wc ich singe·
er warf an si gar smehen mist·
dar nach erdaht er einen wunderlichen list·
dc er si trůc zv̊ zeines brvnnen springe·
er wusch mit gůtem willen abe swa er si hat entreinet·
dc im der kúnig gvnste iach·
vf dis selbe zimber hoͤrt von erz ein tach·
ich mv̊s in prisen swer mirs rehte erscheinet·
von Eschelbach
Sit ich mit erze teken sol·
got von himel ist der kúnig so pruͤue ich wol·
zwo selen bi den schoͤnen kinden beiden·
die mannes bilde tragent wib·
tote von der sele lebendig wirt ir lip·
si habent der krone niht die wile si heiden·
sint die bringet in der tǒf bi zwenzec wochen riche·
dis tragent die vier vf hǒbten zwein·
swer mir dc wider wirfet der mv̊s sprechen mein·
sus deke ich froͤmdes zimber meisterliche·
Eschilbach
Nv merke ein man vnd selic wib·
wie nv die sele pinen kan ein valscher lip·
vnkúsche wert ich pruͤue bi den dornen·
swenne so dc herze tůt den mein·
dc es vnd ǒch dú zunge hellent niht enein·
so tritest dv mir fuͤssen vs erkornen·
alsvs der lip die sele kan in disem pfůle vnreinen·
swenne er si in die sv́nde leit·
vnd niht dur weschen zv̊ des brvnnen sprunge treit·
got schamt sich sin swes leben kan so versteinen·
eschilbach
Der sine frúndelinne trůc·
ze des brvnnen sprvnc swie froͤmde mirs din mv̊t gewůc·
dc wc ein man vnd hatte gv̊te witze·
wir heissen sv́nde smeher mist·
des brvnnen sprvng ein wol gewirdet priester ist·
swer sich nv huͤten wil vor helle hitze·
der lasse rúwe vnd ǒch den priester sich mit strafe rechen·
so git der kúnic in froͤiden me·
der ime die frúndelinne gab ze rehter ê·
swer besser meister si den heissent deken·
her walther·
Dv dekest dc ich niht kan wern·
des wellent mir die trehene minú ǒgen sern·
fúr war ein wiser engel dc erdahte·
dc heinrich von ofterting·
den krieg ie vant da von sich hůb des brunnen spring·
vnd er dich meister her zelande brahte·
walther von der vogelweide so bin ich genennet·
von sange sost mir niender kvnt·
der so verre sv̊che hoͤhe vnd ǒch den grunt·
dc hat min herze als einen schǒb enbrennet·
Ze paris gůte schůle ich vant·
ze Constantinopel ist mir wol erkant·
der kern von kvnst vs meister pfaffen sinne·
zebaldac ich zeschv̊le kam·
wand ich zebabýlone hohe kvnst vernam·
drú iar ich diende in machemetes minne·
der kvnde mir dc herze wol von rehten sinnen wisen·
dc wc der heidenschefte spot·
roͤmsche pfaffen hoͤrent wir hant einen got·
er ist sins kindes kint den wir da prisen·
wolfram
Es giengen schaf an einemgras·
der hv̊ten hirten fúnfe als vil als do der schafe wc·
nv hoͤrent froͤmde wunderliche tvkke·
dú zwei dú saten vf dc gras·
salzes vil ich wenne dú eine ein frowe was·
vnd trůg vil krumber stebe vf ir rugge·
si wiste einen traken stark ze walde bi gevilde·
der in dú schaf durh girde fras·
si lechten in fúr den drússel dur salzes dras·
svs wurden si irem rehten meister wilde·
wolfram·
ICh mein ob in des salzes vart·
wirt niht benomen der dritte hirte ist von der art·
das in wasser dar mit listen flússet keret·
zwo frowen siht man bi in stan·
so sint die hirten fúnfe die man da sach gan·
si riefens an nv helfet vnd leret·
dú zwei du wellent vns dú schaf benemen dc ist mir leide·
dú sehste zúrnen niht verbirt·
si sprach si lekkent saltz dc in zegallen wirt·
si sint verlorn swenne ich mich von in scheide·
klingsor
[223r] Von babilone basiant·
der mit sinen listen an den sternen vant·
wie man vs kupfer clares golt gewinnet·
der ist ein blafůs vf der vart·
min hohe kvnst im stiget fúr in valken art·
nv hat vns einen leigen bas besinnet·
der aller wunder hat gewalt ein got vnwandelbere·
gegen den erzeige ich solhen sin·
mit sange ist dc ich einen tac bi lebenne bin·
swer vindet grunt der ist ein mer wattere·
klingsor·
Wolfram ich lasse dich niemer fri·
nv sich dar zv̊ wes kvnst dar vnder besser si·
min kvnst al dine sinne mv̊s erschellen·
dv mv̊st ǒch ellú minú zil·
die grúnde vnd ǒch die hoͤhe varn swar ich wil·
leuiathan vnd ander sin gesellen·
die mvͤssent mir ein gǒggel spil vs diner kv́nste machen·
semmir iesus der megde kint·
der vns erloste wir weren anders alle blint·
an dem gelǒben kan mich nieman swachen·
klingsor·
Nv sage mit meister svnder has·
wan vindet dc man gotes tǒgen fúrebas·
niht sůchen sol swer wesen wil bi sinne·
ein quater mit vier essen stat·
dc iegeliches sine gezierle svnder hat·
nv hoͤre wie ich dis halbes sagen beginne·
das quater eine drien habet so heltet es die drie·
swer nv da fúrbas sinnen wil·
dem mac der ham wol risen vf des hirnes zil·
vnd wirt von allen witzen gar der vrîe·
eschilbach
So hies ich niender wolferam·
vnd kvnde ich dine wilden wort niht machen zam·
was hulfe sante brandan mich der wise·
der in dc vinsternisse kam·
vnd er das bv̊ch von eines ohsen zvnge nam·
den ohsen ich dir zeinem esse prise·
das ander esse dast ein loͤwe ob ich es rehte merke·
dc dritte ein ar dc ist mir kvnt·
dc vierte ein mensche ich ruͤre an dines sewes grunt·
vnd schat doch gotte niht an siner sterke·
klingsor·
Ich wil gelǒben dc den list·
ein engel vindet alde der túfel in dir ist·
nv hoͤre von dúringen fúrste riche·
ich wils ǒch allen pfaffen klagen·
die den úbeln geisten argen willen tragen·
her sathanas ob ich úch hie entwiche·
dc kan doch balde niht geschehen swie gerne ir mich nv krenket·
ir mvͤsset rumen mir das vas·
welt ir in minem wage iht watten fúrebas·
ich vinde noch dc úch zegrunde senket·
klingsor·
Swer dich wil haben in leigen pfliht·
wolferam der hat der rehten witze niht·
astronomie dú ist dir genême·
wiltv dichs niht gegen mir enbarn·
nasýon der túfel mv̊s mirs doch ervarn·
noh hinaht swenne er vindet dich alleine·
semmir iesus der megde svn von tolvs ich in bringe·
ald ob er wer in kriechen lant·
er tv̊t mir alle dine kvnst von grvnde erkant·
nv huͤte dich swie ich mit im gedinge·
von eschilbach
Ich wolferam mv̊s mich bewegen·
swc dv vnd dine tieuel kv́nste mv́gent gepflegen·
die bringe vns her wan ich alhie bezúge·
dc ich dc quater rehte vant·
augustinus der si min gezúc benant·
vnd daniel mit dem ich niht entrúge·
leronimus der nam dc bůch brandan vs siner hende·
da von es kam in schoten lant·
ich froͤite mich dc ich die hohen wirde vant·
er zage swer hie den ruggen flúhtic wende·
klingsor·
Dv hast Iˢonimus genant·
da mitte brandane[WS 6] helle vnd erde wart bekant·
wafenna was der himel kan bedeken·
ein engel gab den wisen man
ein bv̊ch da von er manig herzeleit gewan·
do er die schrift gelas an einer eggen·
er zêh den engel vnd dc bůch gar trugehafter mere·
vor zorne warf ers in die glv̊t·
der engel sprach sit dis din vngelǒbe tůt·
dv mv̊st es wider holn mit maniger swere·
hie mitte waren[WS 7] si des tages gescheiden· vnd kan der túfel Nafion vnd sang dis liet·
Nv sage hastv meisterschaft·
wie dc firmamente mit vil hoher kraft·
gegen den planeten allen wil gekriegen·
vnd der polvs artanticus
dar zv̊ der hohe meister stern antribilus·
nv sage mir war dv kanst mich niht betriegen·
saturnus swenne er osten stat wc tútet vns sin wunder·
kanst dv der eines mir gesagen·
min mv̊ien wil ich gar gegen dir verdagen·
wand ich dirs alles han genant besvnder·
Eschelbach
[223v] Wolframes zorn was so bereit·
dc in der túfel mv̊te vil dc wc im leit·
er sprach in weis niht wc din frage meinet·
ich enrůch wies osten western stat·
in weis wie iegelich sterne nach sinem cirgel gat·
der si geschv̊f der hat ir ganc vereinet·
clinsor hat dich har gesant mit siner zǒberie·
div wunder die dv hast genant·
dú sint so hoh dc si mir gar sint vmbekant·
dc waltet ganz ein quatter vnd ein drie·
Do sprach der von eschilbach in kan dir sin nit gesagen des wart der túfel zornig vnd sang aber dis liet·
Dvr was hast dv mich har gemvͤt·
wolferam nv sich her wie min leben gluͤt·
růrt ich den enzenberc in disem zorne·
er mvͤste ze úseln werden gar·
ob ich iht me von dinen schulden irre var·
mag ich so wirst dv von mir der verlorne·
dv bist ein leige snippfen snav dú liet wil ich hie schriben·
la clinsor sine meisterschaft·
mvͤiet er mich her mit siner worte kraft·
dir moͤhte lieber sin min dort beliben·
wolfram·
Vmbe dine mvͤie ist mir niht kvnt·
ich wolde ǒch dc dv werest an des meres grunt·
dc dich gesehe niemer me min ǒge·
der dc firmament gelâssen hat·
vnd in des hant gar ellú dinc beslossen stat·
der schirme[WS 8] mich vor dir mit siner tǒgen·
din komen ist mir vnmassen leit dc zúge ich an die heren·
dú den gebar der si geschv̊f
vnd lost vns von der helle mit sines todes růf·
maria maget růch vns von schulden keren·
eschilbach·
Wolfram ein krúze fúr sich reis·
der túsel fůr sin weg vor zorne was im heis·
er furdert sich niht langer er do beite·
er fůr ze klinsore san·
da ich da was dc ist ein engeslicher man·
er streich fúr sich die lenge vnd ǒch die breite·
dar vmbe kvm ich niht mere dar wie ich mit dir gedingen·
dv mv̊st dar selbe zv̊ zim varn·
er ist so klůg dv kanst dich niemer des bewarn·
dir mvͤsse an dinen eren misselingen·
Do si an dem andern morgen ze houe kamen do seit her wolfram wie der tieuel bi im was gewesen· do sang her klingsor aber do dis liet·
Nigromanzie erkenne ich gar·
astronomie[WS 9] nim ich an dien sternen war·
vinde ich die clamanie in rehter ahte·
so kvnde ich wol die warheit sagen
dc allen pfaffen meistern mvͤste wol behagen·
wie altissimus lvcifervm mahte·
vier dinc hat er an in bewant wilt dv dich des beheften·
dc dv mir sagest ir vnderscheit·
so hat got vil hohe wirde an dich geleit[WS 10]·
vnd bist in hoher kvnst mit meisters kreften·
eschilbach·
Sibillen kint felicia·
vnd ivno die mit artuse beide sint alda·
als mir nv sante brandan hat betútet·
der clinsor tůt vns vnbekant·
vmb den botten den artus hat vs gesant·
vnd saget vns niender wer die gloggen lútet·
altissimus lucifeч hat geworht vs vier vvinden·
er gab im aqilones art·
me danne dekeines davon er hohuertic wart·
her klinsor seht svs kan ich wunder vinden·
klingsor
Der meister wening ist benant·
den es si kvnt wan einer derst in kriechen lant·
der ander in der babilonien riche·
in ungerlant dan ist ir niht·
wan ich bin hie dc herze mir gegen paris giht·
da si ein meister der sich mir geliche·
des botten ich zv̊s wirtes maget mit worten han gebvnden·
fúnf tage mv̊s er da betagen·
der lert si manige wisheit singen vnd sagen·
so vert er hin so hat sis vberwunden·
eschilbach·
Do sprach der edel fúrste wert·
dc wil ich selbe schowen bringet vns dú pfert·
ich mac dekeines botten drvmbe erbiten·
ist sinnic wol des wirtes maget·
swc mir der clinsor iemer wunders danne gesaget·
so wil ich niemer tag da wider striten·
dú fúrstin sprach ich wil ǒch dar han wir die gemellichen·
an des wirtes magt verlorn·
dc mv̊s mir vf den klinsor lange wesen zorn·
si gienc hin abe mit frowen tvgenderichen·
klingsor·
Nv hoͤrent warheit vnd sin·
dc ich von hoher kúnste ein meister pfaffe bin·
vs [224r] zwenzic kúnicrichen her gepferret·
nv tůt ein leige mir bekant·
solhe kvnst den ich hie sv̊che in dúringen lant·
das sin bescheiden mine frage derret·
ich wolt ir aller sinnes wag mit miner kvnst erschoͤpfen·
ich sach ir einen sigelos·
der den buggelere fúr den schilt erkos·
swie doch sin swert gar hohe kvnde koͤpfen·
eschilbach·
Dv́ lantgreuinne kam al dar·
ze wartberg vf den palas so wart man gewar·
vierzec frowen bi ir vnd dannoch mere·
der ahte hoh greunne sint·
von abenberg des hohgebornen werden kint·
dú fúrstin zoh si fúr sich dur ir ere·
wan es wc in ir selber hus· dc stvnt ir wol zeprise·
da sach man den von eschelbach·
als man horanden vor der kúnigin hilten sach·
der klinnsor sprach nv singent meister wise·
klingsor
Heinrich von oftertingen hat·
den schilt an mir swer mit dem buggelere stât·
der mac doch eine schanze wol versnellen·
der schriber vnd bitterolf·
die sehen lieber bi in einen wilden wolf·
dannoh wil walther sich zů zin gesellen·
wolfram von eschelbach der ist ir aller buggelere·
der schirmet wol fúr swertes snit·
so weis ich kunst da fliegent rútelinge mit·
vnd ist ir smalen schirmen gar zeswere·
von eschilbach
Swer wirfet rúttelinge scharpf·
vs kúnste schilde alsam der klinsor zv̊ mir warf·
vnd ich des vnverschroten vor im blibe·
so dc min sin im kreise stat·
min vf geworfen kvnst mit sv̊che gegen im gat·
dc er mich niht ein fůs dar hinder tribe·
mag dc von legen kvnst geschehen des hat ein pfaffe schande·
ich wils dur tútsche priester lan·
min sin was hoh in sprungen der mv̊s lise gan
dvrh das mans iht verneme in vngerlande·
klingsor
Nv wil ich pruͤuen einen tanz·
von ritterschaft vnd ǒch von edelen frowen glanz·
vil schoͤnre megde nv hoͤrent froͤmde mêre·
dar zv̊ werder knappen me·
vnd ǒch da bi ein schone massenie ste·
in prisent ahte meister clingesere·
nv merke eregernder man ob man dich solte mieten·
dc dv gest in des tanzes pfliht·
tů grosse hǒbet schande zú zir angesiht·
wan mv̊s dir vil gv̊tes drvmbe bieten·
eschilbach
Dv bist der witze gar ein kint·
got vnd ǒch sin mv̊ter dú sint niender blint·
si sehent von dem himel dvr die steine·
die heiligen vnd der engel vil·
noh verre hoher sint danne des tanzes zil·
vor den dv tůst die hǒbet sv́nde vnreine·
hastv des gelǒben niht dc si es kvnnen erkiesen·
dc machet dich an selden lam·
wer sprichet nv din wort si sint dir alle gram·
lib vnd sele dv dankes wilt verliesen·
klingsor·
ICh lobe die menschelichen art·
vnd meine die reinen maget dv́ gotes mv̊ter wart·
nach siner art mac ich mich niht gepinen·
danne die er an der stvnde nam·
do er dvr vns zirme reinem libe kam·
seht alsam der svnne dvr das glas kan schinen·
svs kan dv́ reine gotheit zv̊ siner mv̊ter libe·
bin ich an pfaffen kúnste snel·
so schein er wider vs ir dvr das ganze vel·
ir was doch we zv̊ helfe manige wibe·
wolfram
Von dúringen herre in tvgennde[WS 11] zil·
vor allen fúrsten hant dich die besten vserkorn·
einen krieg ich dankes halten wil·
den lasse ane zorn·
ich han die sterne vberlesen·
gar an den stremen die zv̊ dem manen durh bescheiden gânt·
des wil ich aller pfafsen meister wesen·
die kvnst in herzen hant·
zephiras vnd aquilan· ir heben vnd ir lassen
polus vnd auster kvnnens niht bewarn·
ich wisse ir aller endes mal·
svnne vnd des manen vmbekreis zel ich bi rasten wol·
swer úch des bas danne ich bescheiden kan·
mit sanges kv́r·
den selben man
zúch ich vor allen meistern iemer fúr·
wolfram·
Ein stram von occidente gat·
allen sinen orden tůt ú min singen schier bekant·
der zwelf hǒpt sterne hat
die die fúrsten sint genant·
vnd einen kúnig den gezimt·
lieg ich ú vmb ein har so breit heisset mich der witze ein kint·
der sin bescheiden von dem manen nimt·
der zeichen núnú sint·
vmb die wunder brandan mv̊ste pine [224v] vil ervarn·
der edel fúrste hohgeborn vs menschlicher[WS 12] art·
vier engel er mit hornen vant·
der eine der zeiget im vnd wiste in vf die rehten vart·
clinsore wilt dvs· mit sange wider streben
des mich bevilt·
dir wirt gegeben
dc ich swige swa dv sprechen wilt·
wolfram
Clinsore ist dir iht bekant·
wie man die zwelf sternen nennet· vnd den si hǒptent an·
die werdent dir vil schiere von mir genant·
vnd wie der mane kan·
erzeigen kúnftekliche tat·
des himelriches froͤide vnd der helle herzen sere·
ein stram dort her von oriente gat·
an den wir michels mere·
der hǒbtsterne vinden vnd ir ingesinde schar·
die alle geliche bůchstaben zv̊ dem manen tragen·
vnd einer rede ich mich enbar·
got die koͤre núne hat gemachet dc ichs sage
wie er darinne mit sinen engeln var·
der schal ist min·
nv la dc sin·
klinsore dv bist gegen mir verstvmmet gar·
klingsor·
Dv gehest miner stvmmen art·
vnd wie din kvnst mit schalle in adelares wise var·
swer grunt sv̊chet da nie grvnt enwart·
der kumt von witzen gar·
vnd sinnet vmb den núnden kor·
was si dar obe vnd ob er der gedanke niht verbirt·
gelǒbet mir dc er vil lihte ein tore
in sime hirne wirt·
solte aber ieman wissen von der menschlichen hant·
so wil ich wider krieges dich in kurzen ziten wer·
von constantinopel basiant·
mv̊s gegen dir in kreisse sten· bringe ich den meister her·
zwen vnd sibenzec streme an den himeln sint·
mit sternen breit·
dv wirdest ein kint·
swenne er die hohen kvnst dir vs geleit·
klingsor·
Dv hast ein spil gesetzet an·
wc helfen sine tage· den niemer affenheit bevilt·
dc mêschen sin vol reichen niht enkan·
noh niemer wirt vol spilt·
din froͤide mac sich wol vergan·
er ist gerucket so· dc er stet svnder hůte bar·
da ritter vnd roch gewaltic stan·
der nimt ein meister war·
zwo clammanie an stnen tv̊t din singen mir bekant·
die geliche ich zv̊ den venden als ich noh bescheiden wil·
die sibenzec sint dir vmbekant·
des han ich ritter vnd roch in miner kúnste zil·
dc hat zabulones bůch geseit·
von babilon·
gar vnverzeit·
bring ichs in der dúringer herren don·
wolfram
Wer dc ein eit ich hiesse in mein·
wer gab dir zabýlones bv̊ch· sage fúrwert wiser man·
dc vigilius vf den agetsteine
mit grossen noͤten gewan·
vnd wie das bůch getihtet wart
von einem meister der doch lange bette an ein kalp·
er wc ein ivde von der mv̊ter art·
vnd ein heiden vaterhalp·
vnd was der aller erste der sich astronomie ie vnderwant·
dc ich die warheit weis dar vmbe dult ich dinen zorn·
eines nahtes er an sternen vant·
dc bi zwelf hundert iaren wurde ein kint geborn·
da von vs eren alle ivden wurden veriaget·
dc wc im leit·
die arbeit·
der mv̊ter sin het ers vil schiere gesaget·
wolfram
Dú frowe wart in schriken rot·
si sprach svn dv hast von mir der hohsten ivden art·
vnd bist genaturt als der galidrot·
sinú lieben kint bewart·
der vogel wirt niht sanges lut·
die wil auster vnd boreas sich hebent vnd blêient·
von im getrútet niemer wirt sin brvt·
swenne die winde weient·
als aber die zwene ir vber schalles werdent in getan·
ir natur ist zerboͤsten art· dc reht mir volget
als aqilon wirt vs verlan·
vnd mit dem zepfirus dc reine svͤsse wirt die zit·
die vogel tragen vf ir kuchel dan·
mit froͤiden leben
kint ivnger man·
der orden hat din mv̊ter dir gegeben·
wolfram·
Dv́ frowe do den heiden wis·
des vbergienc er sprach ich wils erwenden svnder wan·
es wellen danne die goͤtte ir hohen pris·
an mir verderben lan·
min sin der wirfet es her vnd dar·
es ist ein wunderlicher got der die gedanke hat
in astronomie trúwe ichs wol ervar·
wies vmb dc wunder stat·
apollo vnd teruigant vindens niender hap·
nv sv̊chet mines sinnes anker nach des grvndes zil·
der erden sprach vnd stimme gap·
der tet es wol wan im [225r] deheiner wunder ist zevil·
mv̊ter ich wil nach der ivden kúr·
tihten ein bůch·
kvmet es in fúr·
es wirt in gůt fúr disen argen flůch·
her wolfram von Eschelbach
Nv greif er in astronomien kúr·
nach grossen zǒber listen· stv̊nt al sines herzen wan·
in nigromantie nam der meister fúr·
da schreib er wunder von·
nv hoͤret wie er sichs vnderwant·
von disem bůche virgilis nam sin meisterschaft·
eins dezedemones hut er vmbe bant·
dú git dem hirne kraft·
vnd saf von lignun aloe· fúr der argen lufte var·
het er in eime golde dvr den edeln svͤssen smac·
dc machet im dú ǒgen klar·
zwelf wochen vnd ein iar· er diser herte pflag·
nv ist dc bůch bereit gar svnder wanc·
der kvnste wielt·
einen geist er twanc·
dc er ims vf dem agtsteine behielt·
klingsor·
Des meres wag dar vmbe flos·
dvr aller ivden ere[WS 13]· gab er von dem libe den zol·
der meister do ein bilde vs ere gos·
der schrift es huͤten sol·
bin ichs clinsore vs vnger lant
so hoͤret froͤmde mere· kan úch wunders niht bevil·
einen klupfel trůg es in der hant·
der stůnt zeswerem zil·
der meister schǒb im einen brief ins hǒbet da ze der nasen·
den klupsel warf es vf zehant·
als ich bescheiden kan·
es verriet ein fliege in eime glas·
dc er v́gillus der meister gewan·
wie moͤhte ein fliege in eime glas gewesen·
wer twanc si des·
swers hat gelesen·
der weis wol es tet aristotiles·
wolfram
Er hat úch niht bescheiden gar·
wie dú fliege wirt gehangen vnd dc selbe glas·
klestronis der mv̊sten fvͤren dar·
der sin geverte was·
nv wart der meister des in ein·
dc er klestronem neren wil vor der helle pin·
in einen rubin twanc ern der ist ein stein·
dc selbe vingerlin·
ich sagt iv wunders mêre wanne der lieder wurde[WS 14] zevil·
von klestrones kvnste vnd vmbe dc selbe vingerlin·
schachzabels half es sider spiln·
dem edeln kúnig dirol· der trůg es an der hende sin·
es galt drú kúnigrich vnd zwelf lant
dur grossen zorn·
da engegen benant
was ie sin hǒbet vnd het ers spil verlorn·
klingsor·
Ich han durh mine kristeheit·
der edeln meide svn verlobt· dc ich niemer lvge gezer
zwene geiste der werlde taten leit·
die wonten vf dem mer·
ich bin ein heiden her gewesen·
also wc aristotiles der dise beide bant·
in babýlone han ichs dike gelesen·
wie si der meister vant·
nv gedenket svmlicher wurd ers vnderscheiden niet·
wie moͤhte ein fliege deheinen rât gegeben dvr ein glas·
es was ein geist ders bůch verriet·
aristotiles der twangen dc er darinne was·
der boͤse geist trůc allem leben has·
als er noch tůt·
was half in das·
doch zeigte er an dem bilde schalkes mv̊t·
klingsor·
ARistotiles was kvnt·
die mere von dem agtsteine svs het ers an geleit·
des gewan er beide wurf vnd ǒch den punt·
vor aller pfafheit·
ze rome ein rich geslehte hies·
dc wc in armvͤte komen dvrh sinen edelen milten mv̊t·
got getrúwen lib noch nie verlies·
ern maches ende gůt·
dú selben vnderscheiden svmelichú sinú wort·
vil schiffe stůnden vmbe den stein sagt in der wise man·
dar inne manic tvsent hort
von golde lege ders mit listen moͤhte bringen dan·
des swůren túre helde an dise vart·
vil manigen eit·
v́gilus wart gebetten dar der trůg vermessenheit·
wolfram·
Nv kos das ellenchafte her·
falian ze hǒbet man der wc ein grave wert·
der gewan einen kiel do vf dem mer·
reht als ir herze gert·
ein iar er wol gespiset wart·
vientlich an zesehen· vnd in klosterlicher wer·
si fůrten alle harnasch an die vart·
vnd pflagen einer zer·
si verwagen sich des tanzes mit den kinden vf dem plan·
si fůrten alle harnasch vnd liehter schilte gliz·
ivncfrowen edeln hende wis·
machen in niemer schappel als si wilent hant getan·
vnd einer koste si pflagen· des si niht verdros·
swies in ergie
vier ohsen gros
si fůrten dc doch leider niht vernie·
wolfram·
Nv sihet man sorgehaften gast·
der doch in sinem herzen het heldes ellen balt·
do si gesahen manigen hohen mast·
als einen walt·
[225v] virgilius hat vns gar ervarn·
des steines kruft vnd dennoch mer· er sinneklichen wag·
des hoͤhe erwindet da der adelar
niht fúrbas fliegen mag·
vnd ander ir vngemvͤte ich ú kv́nde svnder mein·
vier ketten die mit flisse zv̊ den ohsen warn geworht·
die selben nimt in nv der stein·
si fůrn zv̊ zir angesihte hin vber des kieles porte·
vnd kleibten sich hin an des velses want
in hoher luft·
dc menschen hant
niht mohte gereichen zv̊ der selben kruft·
wolfram
Nv werdent sie in selben gram·
sie enhelfent liehte wapen noh kein vermessenheit·
der agstein in do die anker nam·
svs wůchs in klagendes leit·
der kiel der gie in snellem zil·
dc was nach einem mitten tage gegen der vesperzit·
sýrenen hort man do singen vil·
der stimme slaffen git·
die selben sorge in sime herzen nieman ringe wag·
der spise was in zerrunnen dc si pflagen cleiner zer·
kokodrillen wer da slafes pflac·
den namens vs dem kiel vnd trvgen in ins mer·
die grifen namen ǒch ir spise war·
al da si flugen
von sneller par·
dort her von palakers da si ir ivngen zvgen·
klingsor
Vil edeler fúrste in dúringen lant·
heis din landes herren mit ir wilden meren dagen·
dinr ellen si min trúwe· des din pfant·
ich wil die warheit sagen·
ich enrůche wer dichs berihtet bas·
des wolfram in sime herzen hat lihte mv̊t·
des ist iemer offen vnser has·
dc er mir strafen tůt·
palakers hin gegen endia zwelf tusent raste stat·
nie vogel trůgen veder dar·
zů also verren zil· da von er die grifen hat·
es ist ein wunderliche sache· als ich úch bescheiden kan·
palakers hǒbtet hin gegen endian
der hat getwerc
gar svnder wan·
von golde wirkent si die spehen werk·
klingsor·
Sinnels heisset ein getwerg·
palakers ist sin eigen vnd lit bi dem leber mer·
kúnig ist es vber den selben berg·
getwerge ein michel her·
pfliget er so hat der brv̊der sin·
gebirge in tútschen landen· vnd in der walhen landen·
der selbe kúnig der heisset laurin·
im ist vil tugende bekant·
sinnels het in dem lande kleiner froͤiden zer·
die wúrme giengen im an den berg· des gewan er sorgen pin·
kokodrillen namen im sin her·
des sant er botten manigen zů dem kúnig laurin·
dc getwerc im da zwei grifen eier gewan·
die ein strus besas·
hoͤrt ob ichs kan·
lat úch der mere berihten fúrbas·
klingsor·
Wie nv der mantel were da·
in clestria enflisia· dc fúnfte bla·
dar vs von fúres fvnkeline brande·
vil manig gůt stein drinne liget·
die treit ein tier das doch sin last vil ringe wiget·
in clansion als es dú schrift mir nande·
Monozrius trůg es vf sime hǒbt vnder eime horne·
dar inne ist ein stůnden svnnelin·
dc dvr die ganzen mvre brach ir liehter schin·
owe wc krone trůc die vserkorne·
wolfram·
Ich wil die krone bringen fúr·
dú wart geworht von sehtzec tvsent engel kúr·
die wolten got von himelriche dringen·
lucifer sich dú was din·
swas nv werder wiser meister pfaffen sin·
die wissen wol dc ich die warheit singe·
sant michahel sach gotes zorn in vbermvͤte twale·
die krone brach er im svnder danc·
von dem hǒbet dc ein stein dar vs gesprang·
der wart ǒch sit vf erde parcifale·
klingsor·
Got tet als er noch dike tv̊t·
vnreht hohvart nimt er die lenge niht fúr gůt·
lucifer mvͤste von dem himel vallen·
mit im vil manic engel schar·
ir liehter schin kert sich in swarze varwe gar·
ir svͤsse dú wart zeiner bitter gallen·
alle dies gedahten dc sich lvcifer moͤhte gelichen·
dem svͤssen got zer selben stvnt·
die mv̊sten vallen in der tiefen helle grunt·
da sis an ende mit iamer mv̊sten richen·
wolfram
Den stein der vs der kronen sprang·
den vant der ie mit hohem pris nach wirde rang·
Týturel der dike mit siner hende·
die ritter rerte vf der erden dach·
den walt man in mit richer týoste swenden sach·
si sprachen wichet dort kvmt der genende·
es kerten schone frowen dar mit liebe ir ǒgen svͤsse·
swene er sich in die pondier [226r] flaht·
vnd durh die ganzen schare brach mit siner maht·
so sprach manig roter mvnt dc dich got gruͤsse·
klingsor·
Ich han geflohten einen strang·
swer mir den loͤset dem wil ichs iemer wissen danc·
mit meisterschaft wil ich in zv̊ mir setzen·
wirt ein vaden von im versnitten·
wisset dc kvmt niht von meisterlichen sitten·
so wil ich in an rehten kv́nsten letzen·
er sol mir billich siges iehen ob er mirs niht erloͤset·
so wil ich im sagen mat·
dc es die fúrsten hoͤrent hie an diser stat·
dc min kvnst ob der siner ist geroͤset·
wolfram
Den sig hat got in siner hant·
swem ers gan dem wirt der meisterscheft bekant·
wil er mir helfen so fúrhte ich úch kleine·
ich entwiche iv niemer einen fůs·
ich wil mit rehter kv́nste ú sagen mattes bůs·
ia aht ich niht uf úwer dro alleine·
úwern wâg den wat ich wol der ist mir noh gar sihte·
ir grabt danne tiefer úwern grunt·
oder ich tv̊n úch hie vor disen fúrsten kvnt·
dc mir úwer sin ist gar zelihte·
wolfram
Den tanz kan ich ze rehte spehen·
swenne got sprichet blaset vf so ist es geschehen·
der don durh aller menschen ore erklinget·
so ersten wir an der selben stvnt·
vnd kvmen fúr gotes gerihte der dvr vns wart verwunt·
iegeslichs sin schvlde an sihtecliche dar bringet·
swenne der tanz ein ende hat zwen reien werdent gefuͤret·
der eine in die ewekeit·
der ander zehelle in iemer