Jvnge vnd alde

Jvnge vnd alde·
froͤit úch gegen des meien zit·
wan es grůnet in dem walde·
seht wie schon er lit·
sost dú heide·
svmerlichen wohl bekleit·
dú hat blůmen vf ir kleide·
der ist si gemeit·
vf dem rise·
doͤnent wol zeprise·
vogellin ir schal·
svͤsse wise·
singet nahtegal·

Swen die rifen·
twungen vnd darzů der snê·
der sol nv ze froͤiden grifen·
sit man siht den kle·
sost min wunne·
gar ein reine selig wib·
mich froͤit weder lǒb noch svnne·
niht wan ein ir lib·
die ich da meine·
dest dv́ svͤsse reine·
mir gelúkes vunt·
si aleine·
rot ist ir der mvnt·

Die ich da meine·
lieb vor allem liebe mir·
dú ist alles wandels eine·
es lit lob an ir·
swen si minnet·
der wirt liebes wol gewert·
ob er rehte sich versinnet·
ald er liebes gert·
svͤssú minne·
minne meisterinne·
minne ich meine dich·
twing ir sinne·
dc si minne mih·

Frowe schoͤne·
frowe an der min froͤide lit·
frowe die ich mit lobe kroͤne·
hilf est an der zit·
trut mins herzen·
liebes lieb ich meine dich·
svͤsse wende minen smerzen·
trost nv troͤste mich·
frowe ich mv̊te·
des in minem mv̊te·
dc min gernder mv̊t·
dich niht mv̊te·
sost min wille gůt·