Ir froͤit úch ivnge vnd alte

IR froͤit úch ivnge vnd alte·
der meie mit gewalte·
den winder hat verdrvngen·
die blv̊men sint entsprvngen·
wie schone dú nahtegal·
vf dem rise·
ir svͤsse wise·
singet wunneklichen schal·

Der walt schone lǒbet·
min mv̊ter niht gelǒbet·
der mich mit einem seile·
sprach ein maget geile·
bvnde mir einen fůs·
zv̊ der linden·
mit den kinden·
vf den anger ich da mv̊s·

Das gehort ir mv̊ter·
ia swinge ich dir dc fůter·
mit dem schippfen vber den rugge·
dv vil kleine grasemvgge·
wa wilt dv huppen hin·
vs dem neste·
sitze vnd beste·
mir den ermel wider in·

Mv̊ter mit dem steken·
sol man iv die runzen reken·
die alten als ein svmber·
noch húre sit ir tvmber
danne ir von sprvnge vart·
ir sit tot·
vil kleiner not·
ist iv der ermel abe gezart·

Vf spranc si vil snelle·
dv tieuel vs der helle·
ich wil mich din gar verzihen·
dv wilt úbel gedihen·
mv̊ter ich lebe e doch
swie iv trǒme·
bi dem sǒme
durh den ermel gat ein loch·