Ich wolte gar von froͤiden gan

Ich wolte gar von froͤiden gan·
do troste mich ein roter mvnt·
er seite ich solte in froͤiden stan·
er wolte machen mich gesvnt·
troͤstet er das herze min·
mit also froͤidericher tat·
ahý wer wolte ich danne sin·

Sich solte froͤwen wol min lib·
vnd solte miner eren pflegen·
gebe dc ein minnekliches wib
so wolt ich sorgen mich bewegen·
ir munt der ist so stete gar·
sit er dis gesprochen hat
das er vor sorgen mich bewar·

Ja richer got wie sanfte es tůt·
den gruͤsset wol ein lieblich wib·
dem wirt so froͤidenrich der mv̊t·
dc herze vnd ǒch der sine lip·
hoh vf gen den lúften var·
sin mv̊t der flúget also ho
alsam der edel adelar·