Ich wil min gemvͤte erietten

Ich wil min gemvͤte erietten·
dc niht sorgen drinne si·
trut gespil nv hilf mir tretten·
nv sint doch gedanke vri·
dc die nieman vberwindet·
ich han fvnden mir ein spil·
der mir minen vinger bindet·
so wúnsch ich doch swc ich wil·

Des solt dv mich niht erlazen·
so wil ich dir mere sagen·
al min truren ware verwassen·
moͤht ich einen man veriagen·
sih der wil mich froͤide noͤten·
vnd doch sorge nit erlan·
io mvͤs er mich niunstvnt toͤten·
e ich wurde im vndertan·

Liebe den solt dv mir zeigen·
lihte vinde ich einen list·
dc wir in mit zuht gesweigen·
ald den rat der besser ist·
var vurder betwungen minne·
vrie liebe gar verholn·
dú erflǒget vns die sinne·
swez ist dc da wirt verstoln·

Swer mit leide wil ertwingen·
liebe der toͤret sich vil gar·
lieb liebe leit leiden erringen·
kan ich wil ze froͤiden schar·
selde vnd ir gesinde waltir·
die mit froͤiden sin gemeit·
froͤlich ivgent blvͤgent alter·
git vnd ander werdekeit·

Wol zimt allen gv̊ten lúten·
tvgenthafter hoher mv̊t·
herzelieb mit wunschen trúten·
dc ist vúr vngemvͤte gv̊t·
nieman kan mich des erwenden·
der mir tǒgenlich ist holt·
dem wil ich min herze senden·
dc si siner minne solt·