Ich wil aber singen (Der Marner)

Ich wil aber singen·
ein liet hin zestúre dien kinden·
dc sú mitte enpfahen den meien·
tanzen vnd springen·
ir megede wol vf zv̊ der linden·
da svn wir mit handen vns zweien·
hie ein tschabel dort ein krenzel vf ir hǒbet·
da hat vns der meie sinen kran erlǒbet·
zesv̊chen· swc wir siner varwe gerůchen·

Nv froͤit sich dú heide·
der walt vogell mit ir stimme·
nahtegal dú liebe in der owe·
noch lebe ich mit leide·
der iamer mich twinget mit grimme·
dc mich niht engruͤsset min frowe·
leit mit liebe in minem herzen ist gemischet·
da von mir der lib in froͤiden dike erlischet·
ich tvmber·
sol mich niht veruahen min kvmber·

Stvͤnde in miner hende·
dc riche si truͤge die krone·
dc si ir armen frúnt icht versmahen·
swer si des wende·
dc si mir nah dienste niht lone·
der mvͤsse alle sin selde vergahen·
nit wc ie da vor so hvͤten sich die besten·
das die valschen von ir nide niht gar zerbresten·
dc meine·
mag ich von ir scheiden noh neine·

Ist ir herze ersteinet·
so trúget ir lachen mih sere·
da bi kan si schone gebaren·
ich bin der si meinet·
mit trúwen mirs nieman verkere·
sit von minen kintlichen iaren·
mag si dvr ir gvͤte mich von sorgen bringen·
ich mv̊z vberhǒbet dike vnsanfte ringen·
in sorgen·
wil si so ist min truren verborgen·