Ich sach vil liehte varwe han (Heinrich von Rugge)

ICh sach vil liehte varwe han·
die heide vnd alden gruͤnen walt·
die sint nv beide worden val·
vnd mv̊ssen gar betwungen stan·
die blv̊men von dem winter kalt·
ǒch hat dú liebe nahtegal·
vergessen dc si schone sanc·
ie noh stet aller min gedanc·
mit truwen an ein schone wib·
ich enweis ob ichs iht geniessen mvge
si ist mir lieb alsam der lip·

Wurd ich ein also selic man·
das ich si lones dvhte wert·
in der gewalt min froͤide stat·
so erwurbe ich das ich nie gewan·
vnd habe es doch an si gegert·
vil wol ane alle valsche missetat·
nv geschiht mir leide in weis dvr was·
ze gv̊te ich ir noch nie vergas·
wil si mich des geniessen lan·
si ist vnd mv̊s sin an der ich stete wil bestan·

So selig man enwart ich nie
dc ir min komen tete wol·
vnd ǒch dar nach dc scheiden we·
sit ich began dc sich verlie·
min herze als es belibe sol·
an ir mit trúwen iemer me·
dú wunnekliche súndet sich·
doch denke ich si versv̊che mich·
ob ich iht stete kv́ne sin·
solt ichs bi dem eide sagen so wc es ie der wille min·