Ich han varnder froͤide vil (Mit aufgelösten Abbreviaturen)

Ich han varnder froͤide vil·
vnd der rehten eine niht die da lange wer·
iemer als ich lachen wil·
so seit mir dc herze min· dc ichs enber·
min ding stůnt mir eteswenne also·
dc ich was mit den andern fro·
des enist nv niht dc was alles do·

Lide ich not vnd arebeit·
die han ich mir selbe ân alle schulde genomen·
dike hat si mir geseit·
dc ichs liêsse ine mohtes niemer ze nde komen·
vnd tůt noch húte swanne si mich siht·
vnd mir leit da von geschiht·
dc si min vnd gebe des nieman niht·

Das ich gediente ie tac·
des wil si geloben niht ǒwe·
vnd swas ich gesingen mac·
das engihet si niht dc si dc iht bestê·
das ist mir ein iemerlich gewin·
svs gat mir min leben hin·
seht wie selig ich ze lone bin·

Nie wart groͤsser vngemach·
danne es ist der mit gedanken vmbe gat·
sit dc si min ǒge an sach·
dv́ mich vil vnsteten man betwungen hat·
den mac ich vergessen niemerme·
dc tv̊t nv vil lihte we·
we wan hat ichs do verlâssen ê·

Ich han iemer teil an ir·
den gib ich niemen·
swie froͤmde er mir iemer si·
owe wan wurde er mir·
dc ich einen tac belibe von sorge fri·
got weis wol dc i ir nie vergas·
vnd dc wib mir geviel nie bas·
wirt mir anders niht doch so han ich das·