Ich han so vil gesvngen dc manger nv geswuͤre wol

ICh han so vil gesvngen dc manger nv geswuͤre wol·
ich hete gar gesvngen vs ich han noh ganze winkel vol·
der kvnst dú reht an singen zimt· als ich si bringe vúr·
ich wolde ê gar swigen ê ich niemer me gesvnge niht·
e dc ich schande also verswige der leider alzevil geschiht·
vnd dc ich minen svͤssen sprvch an valscher milte flvr·
dvrh vorhte maniger swigen mv̊s·
der ǒch dvr losen lop den argen singet·
dem selben wirt zelône kvme ein danken vnd ein valscher grůs·
swer toren froͤit vnd ir gemvͤte ringet·
ich bin vil dike alsam gefroͤit· darnach zetruren mir geschach·
do mir niht bc gelonet wart· vnd ich doch lob mit trúwen sprach·

Swa herren sterbent dc ist schade· vnd sol doch wol werden rat·
wan dc ir eteslicher hie so gar vnnútzen erben lat^{[WS 1]}·
der gv̊t erstirbet des sich vil der lúte solde nern·
wan siht en welden rúten vil· vnd darzv̊ bvwen breitú velt·
wan grebt in silber vnd in golt· dv́ straze vnd alder wasser gelt·
dc dienet in vnde siht man si doch kleinekliche zern·
so we mir we der alten florn·
dc man die ivngen siht so vil verzihen
vnd iemer we· dc ich vúr eteslichen han so vil gesworn·
an dem ich wande er wolde vmbe ere entlihen
sin gv̊t· dien kvnberhaften dem die richer gernde schuldig sint·
wir svln den argen iemer klagen· der vns hie lat sin erger kint·

Nv ist dc rich vnd ǒch dú lant· vil gar an ivnge herren komen·
der alten wirde vnd ǒch ir zuht· da hant ir wunder von vernomen·
nv wúnschent dc der megde kint vergesse ir missetat·
nv werbent aber die ivngen so· dc wir die alten mv̊ssen klagen·
da von dc man si siht bi gv̊te vnd ǒch an werdekeit zergan·
nv wissent doch dc es den edelen richen niht wol stat
nah lobe ir eteliches mv̊t·
so vaste strebt als ich iv wil bescheiden·
dc er niht anders bete me· wan habe din lob la mir min gv̊t·
der wil sich minen svͤssen sprúchen leiden
vil gar die wile vnz ich ersihe wies im an werdekeit ergat·
dar nah so singe ich lihte ein lob dc nahe bi dem schelten stat·

Anmerkungen (Wikisource)

1. Vorlage: ſat.