Ich han min herze

Ich han min herze
der lieben gesendet·
wan min sender smerze·
der ist noch vnerwendet·
ald es enwende dú reine vnd dú suͤsse·
von der ich mvͤsse
betwungen sin·

Genade ir keiserinne·
la genade an mir erschinen·
du gib mir dine minne·
vnd scheide mich von pinen·
la mich geniessen der liebe der guͤte·
dc min gemvͤte·
stůnt ie an dir·

Wer sol mir nv wenden·
min sendes vngemvͤte·
sit es niht wil enden·
ir reinen wibes gvͤte·
dú mich da twinget den abent vnd den morgen·
ich lebe in sorgen
dc klage ich ir·

Sol ich si niht schowen·
dc ist mir iemer swere·
so sint ǒch ander frowen·
zesehenne mir vnmere·
in gesach vf erden nie wib also gerne·
schone als ein sterne·
so stent ir ǒgen fri·

Wa wart in dem tǒwe·
dehein blůme also schoͤne·
zesehenne als min frowe·
die ich mit sange kroͤne·
ir lib der reine der schoͤne als ein gimme·
svͤsse ist ir stimme
des froͤwet sich min sin·