Ich han got vnd die minneklichen minne

ICh han got vnd die minneklichen minne·
gebetten fleliche nv vil manic iar·
dc ich schiere nach unser drier sinne·
vinde ein reine wib so het ich gar·
alles des min herze an einem wibe gert·
wol mich dc ich so werdem wibe vf minne dienen solde·
ob ich doch niemer wurde gewert·
dannoch ich mich solher eren froͤwen wolde·

Senfte in dem mv̊te vnd lieb in den ǒgen·
wie lange wilt dv verderben mir den lip·
frowe gedenke vnd minne mich tǒgen·
ob ich es vmbe dich verdiene selig wib·
sich vf dine trúwe wie we mir senen tůt·
ich wene ich mvͤsse verderben nach diner suͤssen minne·
beschiht dc minne so bist dú niht gv̊t·
twinc die vil lieben als mich ê dc ich gar verbrinne·

Min abent segen min morgen segen·
dc ist alles mit der minneklichen gar·
dc si min flissekliche welle pflegen·
vnd behvͤten swar ich in den landen var·
svme klagent von ir frowen gros vnstetekeit·
dc si in rede erlǒben vnd iegeslichen wellen hoͤren·
dc schat in an ir werdekeit·
vnd an ir reinen tvgent me dans ieman múge getoͤren·