Ich habe ein herze dc mir sol

Ich habe ein herze dc mir sol·
noh grossen schaden oder frumen machen·
ein varnden lon erwurbe ich wol·
da von ich einen svmer moͤhte lachen·
als ich denne den erwurbe·
der wer vnstete sam der kle·
mit den blv̊men er verdvrbe·
so mvͤst ich werben aber als ê·
nah heile mvͤze es mir ergan·
in ger eins varnden lones niht
mich froͤit noh bas ein lieber wan·

Sol mir leit von ir geschehen^{[WS 1]}·
der ich wol gvnde dc ir lieb geschehe·
so hab ich min leit gesehen·
noh besser were mir dc ich ir niht sehe·
wirt mir iemer we von minnen·
so weis ich wol dc si dc tůt·
schoͤne wib mit reinen sinnen·
vor allem valsche wol behv̊t·
owe ia lob ich si zevil·
si minnet liht ein selig man
der were ich gerne sine wil·

Der vngezogen ist so vil·
die wol gezogen werdent schiere vmmere·
ich wene ich vberkeren wil·
sit dc so selig sint die lugenere·
sol man wibes minne erliegen·
war vmbe seit ich dane war·
ich kan also schone triegen·
sa, die da tragent gevarwet har·
die wib verkerent vns die sitte·
vnd hoͤrent gerne lose rede
nv haben dc si erwerben mitte·

Anmerkungen (Wikisource)

1. Vorlage: geſchēhē.