Ich bin ein wege mvͤder man (Mit aufgelösten Abbreviaturen)

Ich bin ein wege mvͤder man·
nv vert mir einer vor
der rennet swenne ich drabe·
als ich der strasse niht enkan·
so volge ich sinem spor·
nv wirfet er mir abe·
die brvgge da ich vber sol·
doh het er mir geheissen wol·
ir stimme ist besser danne ir mv̊t die mit dem blatte glient·
ein valscher frúnt der schat noh mer danne offenbar ein vient·

Entwerfen ist ein speher list·
da hoͤret spotten zů·
al nah der ǒgen spehen·
ich wene reht der maler ist·
ob einer misse tů·
dc es die andern sehen·
vnd spotensz niht dvr minen has·
er schepfe sinú bilde bas·
swer malces pfligt die wile es ligt· dvrh terren vf dem slate·
der lobe min bier vns er besehe wie im sin wurze gerate·

Swer des biderben swache pfligt·
da bi des boͤsen wol·
der hat si beide verlorn·
gewalt den witzen an gesigt
ein sinnig herze sol·
mit zúhten tragen zorn·
des iars kvmt vil lihte ein tag·
dc ers wol verenden mag·
vnrehter gehe nieman pfligt er mvg ir wol engelten·
gv̊ter gebit noch nie gebrast mit schonen zúhten selten·

Swer mir durh sine kv́ndekeit·
den minen toͤrschen mv̊t·
wil bereiten an dc lieht·
der kvmt sin liht in arbeit·
ob ers also getůt·
dc ich erkenne niht·
dc doh vil wol geschehen mag·
kvmt es vs der vinster an den tag·
so sv̊che ich vinder da loch an verlegener wete·
gewinnen mvͤz ich niemer frúnt ern si die lenge stete·