Ich beginne an im in disem done

Ich beginne an im in disem done·
der gedriet stat des name vnd der persone·
des drien iemer ein ewig gotheit ist·
da mit div menscheit wart gereinet·
got was ie ein núwes mensche erscheinet·
...
dú menscheit braht vns zv̊ der ewigen genist·
do si an dem krúze trůg die krone·
hie mit hat iesus crist gar ellú ding beslossen·
geret tǒ dc der gedeones vel hat begossen·
dc schepfer al der planetarum wart geborn·
vnd dem die elemente hant gesworn·
swer mit lobe in eret der vert genossen·

Ich twang einen geist vnzer mich wert·
kv́nftig ding von kvnst zesehenne· in einen swert·
ich sach dar inne vil fúrsten ligen tot·
ich sah die kriechen sere ringen·
ich sach ir kraft constantinopel betwingen·
ich sach zwene bebste reht zvnrehte bringen·
ich sah da von vil blatten wurden rot·
vnt dc ecclesia helfe gerte·
ich sach do me rehten gelǒben stoͤren·
ich sach cristen ê verwerfen in den hohsten choͤren·
dis sach ich kv́nftig vnd hoͤre ǒch wise meister iehen·
anticristes botten sint gesehen·
der beginnet manigen wisen toͤren^{[WS 1]}·

Herre ist ein name der hohste in den richen·
herre dem gewalte kan sich niht gelichen·
von herren gotte vnd der werlde lieb geschiht·
swa herren tugende an herren heret·
swa aber vntvgent herren mv̊t verseret·
da hat herren lib den herren namen gvneret·
vnher si herre des herheit man nv siht·
vs schanden pfat in laster wichen·
ein gemeiner mv̊t giht dc mangerm boͤsen herren·
nie gewan der tot mvͤse si von den biderben verren·
ir dornig herze ir durkel rat· ir gellig mvnt·
hat verhowen da man wc gesvnt·
dc mv̊s lange ir after kvnft gewerren·

Anmerkungen (Wikisource)

1. Vorlage: toꝛen.