Ich ſach vil liehte varwe han

Ich ſach vil liehte varwe han·
die heide vn̄ al den gruͤnē walt·
die ſint nv beide woꝛden val·
vn̄ mv̊ſſen gar betwūgē ſtan·
die blv̊mē vō dem winter kalt·
ǒch hat dú liebe nahtegal·
v̾geſſen dc ſi ſchone ſanc·
ie noch ſtet aller min gedanc·
mit trúwen an ein ſchoͤnē wib·
ine weis ob ichs icht genîeſſen mvge ſi iſt mir lieb alſam d̾ lib·

Wurde ich ein alſo ſelig man·
dc ich ſi lônes dvhte wert·
in der gewalt min froͤide ſtat·
ſo erwurbe ich dc ich nie gewā·
vn̄ habe es doch an ſi gegert·
vil wol ane alle valſche miſſetat·
nv geſchiht mir leide ich enweis dur was·
ze gv̊te ich ir noch nie v̾gas·
wil ſi mich des genieſſē lan·
ſi iſt vn̄ mv̊s ſin an d̾ ich ſtête wil beſtan·

So ſelig man enwart ich nie·
dc ir min kômē tete wol·
vn̄ ǒch darnach dc ſcheiden we·
ſit ich began dc ſich v̾lie·
min herze als es belibē ſol·
an ir mit trúwē iem̾me·
dv́ wūnekliche ſv́ndet ſich·
doch denke ich ſi v̾ſůche mich·
ob ich iht ſtete kv̄ne ſin·
ſolt ichs bi dē eide ſagē· ſo wc eſ ie der wille min·

Minne mīnet ſtetē man·
ob er vf mīne minnē wil·
ſo ſol im mīnē lon geſchehen·
ich mīne mīne als ichs began·
die mīne ich g̾ne mīne vil·
der mīne mīne ich han v̾iehen·
die mīne erzoͤige ich mit der mīne·
dc ich vf mīne mīne minne·
die mīne meine ich an ein wib·
ich mīne wan ich mīnen ſol dvr mīne ir mīneklichē lib·