Ich ſach blv̊men ſchone erſpꝛingen
[53r]
Ich ſach blv̊men ſchone erſpꝛingen·
dc iſt voꝛ dem walde ſchin·
da vō mv̊s min h̾ze ringen·
nach der lieben frowen min·
wil ſi mir genedig ſin·
mit den vogelin wolde ich ſingen·
vns den lieben ſvmer bꝛingen·
Genade frowe ich mv̊s verderben·
iem̾liche vn̄ vnuerſcholt·
iſt iv liep dc ich mv̊s ſterben·
ich wart nie frowen me ſo holt·
ſo wer zekvpfer woꝛden golt·
lihte wil ſi pꝛis erwerben·
lat ſi mich in ir dienſte ſterben·
Meien blvͤte vn̄ ǒch ir guͤte·
ſint ein andern wol gelich·
ſwa die roſen ſtent in blvͤte·
die ſint niht ſo minneklich·
als min lieb des froͤwe ich mich·
doch beſweret min gemvͤte·
dc man ir ſo ſere hvͤte·
Si v̾lieſent alle ir hv̊te·
mag ich mich zv̊ ir v̾ſteln·
dc gefuͤget wol dú gůte
wan ſol frúntſchaft ſere heln·
ellú hv̊te iſt gar verloꝛn·
ob ich die lieben vinde aleine·
ſo ſchat vns ir hvͤten kleine·
Ach[WS 1] got wie bꝛinnet mir min herze·
nach der lieben frowen min·
noh mere danne tvſent kerze·
ach got wan ſolde ich bi ir ſin·
ſi iſt ſo ſchoͤne vn̄ ǒch ſo fin·
als die viol in dem merzen·
dur ſi ſo lide ich manigen ſmerzen·
Solher ſwere ſo mich twinget·
nieman ſich v̾kvnnen ſol·
dv́ mich wol von ſoꝛgē bꝛinget·
ſwenne ſi wil ſo wirt mir wol·
maniger minen kvmb̾ klagt·
mit ſvͤſſen[WS 2] woꝛtē vs dem mvnde·
der mir wol des todes gvnde·