Helfent gruͤssen mir den meien
[208v]
Helfent gruͤssen mir den meien·
der so lobelichen schoͤnet·
anger heide vf berg vnd in dem tal·
wir son tanzen springen reigen·
sit der walt ist wol bedoͤnet·
da hant vogelin froͤiderichen schal·
velt vnd owe stent gebluͤmet·
manig svnder varwe ist da·
wis brvn gel rôt gruͤne· weicvar bla·
da sich nahtegal der zit in sange ruͤmet·
Das dú nahtegal wol singet·
dc gebluͤmet stet dú heide·
des hab ich zefroͤide enkeine war·
ein froͤide in min herze dringet·
frîer herzen ǒgenweide·
vnd ouch libes ǒgen weident dar·
dú froͤid ist so lieb so here·
dc si froͤit herze vnd lip·
dc sint schoͤnů minneklichú wib·
nach der froͤide sinne ein man an der lit ere·
Ein wib ich zefroͤiden minne·
mir zetroste mir zeheile·
mir vúr alles vngemvͤte ein dach·
der vil reinen steten sinne·
frigent si vor allem meile·
so dc si ir wibheit nie gebrach·
got hat wirde vnd ere beide·
seliclich an si geleit·
schone varwe niht vo gvnterpheit·
hat ir lieblich angesiht min ǒgenweide·
Wol dien froͤidegebenden wiben·
die mit zuht in hohgemvͤte·
wiblich mannes froͤiden spiegel sint·
wol ir reinen suͤssen liben·
wol ir rehten wibes gvͤte·
da von langes truren sa verswint·
wibes gvͤte heilet smerzen·
der vns dike nahe lit·
wibes gvͤte vns rehte froͤide git·
wibes gvͤte ist heiles hort in mannes herzen·