Hei schoner grůs hei loser ǒgen blik

Hei schoner grůs hei loser ǒgen blik·
ǒwe vil minnekliches lachen·
wie hant ir mich so gar verlassen vnd verkorn·
ich bin gevallen in der^{[WS 1]} sorgen strik·
von dien vil schedelichen sachen·
das ich úch svnder mine schulde han ver lorn·
vil selig wib gar vnuerschulde lide ich dinen zorn
sol der an mir gewinnen wernden sik·
das tůt min leben also ver swachen·
das ich vil lieber wolte sin noch vngeborn·

Gv̊t wib sit ich din kúnde alrest gevie·
sit wer dv mir in minem můte·
das liebste lieb zer welte alleine vnd keines me·
nach dir gewarb ich offenbares nie·
dv́ zucht was ie in miner hůte·
noch enbin ǒch nit der einer dassin v́bel erge·
die sich von wiben ruͤment anders danne in wol anste·
durch dich sprach ich lob allen wiben ie·
dvr dich gedachte ich ir ze gůte·
durch dich tet mir ir ere wol ir laster we·

Got weis wol in verdiente nie den has·
den dv ane alle mine schulde·
vil liebest alles liebes hast an mich geleit·
dvr lúchtig miner ǒgen spiegel glas·
sit ich den unuerschulte dulde·
so tůs dur wibes guͤte^{[WS 2]} vnd swende minú^{[WS 3]} leit·
gib mir her wider des mich berǒbet hat din werdekeit·
des ie min sendes herze gernde was·
ich mein din wunnebernden hulde·
die dv mir hast můt willend âne recht verseit·

Anmerkungen (Wikisource)

1. Vorlage: inder.
2. Vorlage: gůte.
3. Vorlage: mine.