Got weis wol das ich stete trúwe

Got weis wol das ich stete trúwe·
der herzelieben vrǒwen min·
trage der min herze gert·
von ir der kvmber min ist núwe
doch dvnket mich der selbe pin·
hab wol tusent iar gewert·
an mir senden siechen armen·
wil sich dv́ liebe niht erbarmen
mirst aller gůter froͤiden schin·
froͤmder húre danne vert·

Sol ich engelden miner stete·
der ich mit zv́chten zaller zit·
tǒgelichen han gehůt·
we wes gedenk ich valsche rete·
der argen melder vnd ir nît·
mere mir den schaden tůt·
doch geding ich das min swere
gesenfte noch dú selden bere
an der aleine min helse lit·
swanne sis gewinnet můt·

Nieman mir kan das gar verbieten·
in si der lieben minneklich
in dem^{[WS 1]} můt swie holt ich wil·
des kvmbers wil ich mich genieten·
swar ich var iemer sicherlich·
wan ich weis ir zvcht so vil·
der geslachten wandel vrien·
das ich ir lop můs stete schrijen·
sist rein· sist gůt· sist seldenrich·
sist dv́ liep an endes zil·

Anmerkungen (Wikisource)

1. Vorlage: minneklichen dem.