Got vn̄ der kv́nig wolten kriegen ſv̄der wan

Got vn̄ der kv́nig wolten kriegen ſv̄der wan·
ſi wolten mit ein andern ſere bagen vn̄ bochen·
do ſpꝛach der kv́nig es mag nit mer alſvs ergan·
got hat mich v́berteilet· das war es wirt an im gerochen·
wil er die himel haben gar·
ſo wer ſin herſchaft gar zewît· vn̄ min gewalt gar zênge·
riſſe er mir bas deſ hvſen dar·
aldv́nſre eltú frv́ntſchaft kan gewern nit die lenge·
do ſchied ichſ ſi lieſſens beidenthalb zemir·
ich ſpꝛach her kv́nig ſwas ſi hie niderthalb das habent ir·
ſint ir hie got lant ſich den alten doꝛt began·
tv̊nd ir des niht ich heiſſe v́ch baltlich von dem himelriche ſtan·

Sit das got vnde der kv́nig nv geſcheiden ſint·
ſo wil der ſelbe kv́nig den túfel vs der helle twingen·
da hebt ſich ein gemv́rde von das iſt nit ein wint·
ſo ſint ſi beide froͤidig herre wem ſol da gelingen·
ſi kriegent wer der wirſer ſi·
der ſol pôtſtat ze der helle ſin^{[WS 1]}·
der kv́nig iſt wirſer vil ǒwi·
der tievel kōde in manger zit vertriben nie ſo ſere
lút vn ir lant als ir der kv́nig v̾triben hat·
vn̄ tv̊t ǒch noch in kvrzer vꝛiſt des Jſt kein rât·
ders an mich lât· ich teils dem kv́nige bas denne ê·
ſchied ich in von dem himelrich im wirt der helle deſte me·

Anmerkungen (Wikisource)

1. Hier fehlt das Reimwort dazu.