Got din zorn der ist verschuldet

Got din zorn der ist verschuldet·
schǒwet wie der lǒf nimt abe·
die heiden vaste dringen·
wacha herre wacha vnd wera wer·
kristen her kvmber duldet·
vnd strebet nah dime grabe·
so dc ir swert erklingen·
mvͤssen dem geliche als vber mer·
vngeborn
were vns bas danne ob wir den sig verliesen·
got dv solt dvr diner marter ere verkiesen·
vnd vf den der dc hǒbet ist·
wisse crist·
gesigt^{[WS 1]} otacker iht wir sin verlorn·

Des keisers wal stv̊nt gar schone·
do sin kúnige pflagen ê·
nv pflegen sin welhisse pfafen·
die vervendern segen vnd den tǒf·
dem von stǒfen wirt dv́ krone·
wie es vmbe den von hollant gê·
wil er ze rome schaffen·
ierusalem sin erbe dc ist der kǒf·
vf den val
let der babest sich nach landen dúrsten·
als der tocken spilt der walh mit tůtschen fúrste·
er setzet si vf er setzet si abe·
nah der habe·
wirfet er si hin vnd her als eine bal·

Herre got maht dv vns er zeigen·
ob din kraft mvge vns ernern·
mache vs zwein kv́nigen einen·
dem gerihte liebe vnd cristen ê·
man siht re rǒben eigen
kirchen strazen· doͤrfer hern
man hort die witewen weinen·
vnd die cleinen weisen schrien owe·
solhe not
hat dú arme kristenheit gemeine·
got dvr diner marter willen nv vereine·
der fúrsten rat vnd ir gewalt·
ist gestalt·
als ein meilig hant von blv̊te rot·

Anmerkungen (Wikisource)

1. Vorlage: geſiht.