Gegē diſen winnahtē

Gegē diſen winnahtē·
ſoldē wir ein gemelliches trahtē·
wir ſwigē alzelange·
nv volgēt mir ich kan vns froͤide machē·
ich ſinge iv wol zetanze·
vn̄ nim ir war der ſchonē mit dē kranze·
ir roſe varwē wange^{[WS 1]}·
erſehe ich dú dar zv̊ ſo koͤnde ich lachē·
ſo ſich dú gůte
ſchꝛeket voꝛ ſo iſt mir wol zemv̊te·
vn̄ ir gúrtel ſenkē·
machet dc ich vnd̾ wilēt liebe mv̊ſ gedēkē·

Dv liebes dv gv̊tes·
tv̊ hin la ſtan· dv wūd̾ wol gemv̊tes·
wol ſtēt dine loͤkel·
din múndel rot din oͤgel als ich wolde·
roſe var din wengel·
din kelli blank da voꝛ ſtet wol din ſpengel·
dv rehteſ ſvm̾ toͤkel·
reit val din har· rehte als ichs wúnſchē ſolde·
gedꝛat dine bꝛúſte·
nv tanze eht hin min liebeſ min gelúſte·
la ſitv́li bleken·
ein weninc dvr dē willē mī· da gegē mv̊s ich ſchꝛekē·

Nv lachet ab̾ min flehē·
ich ſchꝛeke ſo dir bloͤzent dine zehē·
die ſint wol geſtellet·
vil ſchonú foꝛme vn̄ h̾zeliebú mīne·
nv tanze eht hin min ſvͤſſel·
ſo hol ſo ſmal ſo wurdē nie kein fuͤſſel·
ſwē dc niht gevellet·
dc wiſſet d̾ hat niht gv̊t̾ ſinne·
wiſ ſint ir beinel·
lindú diehel reit bꝛvn iſt ir meinel·
ir ſizzel gedꝛolle·
ſwc man an frowē winſchē ſol· des hat ſi gar die volle·

Iv ſi d̾ tanz erlǒbet·
ſo dc ir mine frowē niht beſtǒbet·
ſeht an ſi niht dike·
ich fúrhte dc ir v̾lieſent úwer ſinne·
ir zimt ſo wol dc lachē·
dc tvſent h̾zē mvͤſtē vō ir krachē·
ir loſlichē blike
twingēt· mich owe dc tůt ir mīne·
ſtet hoher lat ſlichē·
d̾ ſchonē d̾ ſol mā zerehte entwichē·
wc kan ir gelichen·
des wene ich niht dc iemā tv̊ in allē richē·

Ach ſi iſt ſo ſchoͤne·
dc ich ir lob mit minē ſange kroͤne·
ir wolſtendē hēde·
ir vinger lang als einer kv́niginne·
ſo iſt ſi wol geſchaffen·
da bi ſo kan ſi gemēliche klaffen·
gar ane miſſewende·
neme ich ſi vúr eine keiſerinne·
des ſetze ich zepfande·
mī h̾ze dc ich niend̾ in dem lande·
ſo gv̊teſ niht erkande·
ſiſt ſo mīneklich geſtalt· vn̄ lebt gar ane ſchande·

Anmerkungen (Wikisource)

1. Vorlage: wengel.