Frowe lânt úch niht v̾dꝛieſſen

Frowe lânt úch niht v̾dꝛieſſen·
miner rede ob ſi gefuͤge ſi·
moͤht ichs wider úch genieſſen·
ſo wer ich dien beſtē gerne bi·
wiſſent dc ir ſchoͤne ſint·
hant Ir als ich mich v̾wene·
gvͤte bi der wolgetene·
wc dāne an iv einer eren lit·

Ich wil iv ze redenne gvnnē·
ſpꝛechent ſwas ir went ob ich niht tobe·
dc hant ir mir an gewunnē·
mit dem úwerm mīneklichem lobe·
in weis ob ich ſchoͤne bin·
gerne hete ich wibes gvͤte·
lerent mich wie ich die behuͤte·
ſchoner lip d̾ tǒg niht ane ſin·

Frowe dc wil ich iv leren·
wie ein wib der welte leben ſol·
gůte lúte ſult ir eren·
mīneklich an ſehen vn̄ gruͤſſen wol·
eime ſvlt ir úwern lip·
gebē fúr eigen vmb den ſinen·
frowe woltent ir den minen·
den gebe ich vmb ein ſo ſchoͤne wib·

Beide an ſchǒwen vn̄ an gruͤſſē·
ſwa ich mich daran v̾ſumet han·
dc wil ich vil gerne bvͤſſen·
ir hant hovelich an mir getan·
tv̊nt dvrh minē willē me·
ſit niht wan min redegeſelle·
in weis nieman dem ich welle·
nemē den lip es tete ime lihte we·

Frowe lant mich es alſo wagē·
ich bin dike komē vs groſſer not·
vn̄ lant es úch niht betragen·
ſtirbe aber ich ſo bin ich ſanfte tot·
herre ich wil noch langer leben·
lihte iſt iv der lip vnmere·
wc bedoꝛfte ich ſolher ſwere·
ſolt ich minē lip vmb úwern geben·