Froͤit úch gegen dem meien ſchoͤne

Froͤit úch gegen dem meien ſchoͤne·
froͤit úch gegen des meiē zit·
heide ī gruͤner varwe lit·
ſoſt gebluͤmet berg vn̄ tal·
da bi hoͤꝛt man ſuͤſſe doͤne·
vō dē kleinē vogellin·
ī der blvͤndē bluͤte ſchin·
doͤnet wol dú nahtegal·
walt vn̄ ǒwe·
hant vō lǒbe ein dach·
roſē in tǒwe·
d̾ ich manigē ſach·
ſtent in wūneklich̾ blůt·
froͤit úch ivngē hohgemv̊t·

Sich froͤit al dú w̾lt gemeine·
wā dc ich betruͤbet bin·
mīne twinget mir den ſin·
vn̄ ein reine ſelig wib·
niemā truret wan ich eine·
wie habe ich v̾dienet dc·
ob ich lange dulde ir has·
dc v̾derbet mir dē lip·
ſol ir wiblich guͤte·
mih in ſoꝛgē lân·
min hohgemvͤte·
min troſtlicher wan·
wirt an froͤidē vngeſvnt·
mih entroͤſte ir roter munt·

Minne frowe ſvͤſſe mīne·
mīneklichú helferin·
hilf mir mit der helfe din·
dc min h̾ze fro beſte·
dv bekúmberſt mir die ſinne·
mit der liebe meiſt̾ſchaft·
vn̄ mit diner krefte kraft·
dc mir iſt nach liebe wê·
dú vil liebe al eine·
mich betwūgen hat·
dc ichs beweine·
ob ir troſt mih nv lat·
troͤſt ein ſvͤſſe mīne mich·
ſit ich helfe ſv̊che an dich·

Wenet des dú wolgetane·
d̾ ich alſe kume enbir·
dc ich ſcheide mich vō ir·
dvr dc ſi mich froͤmdet ſo·
dc ich ſtên ir troſteſ âne·
die mīne ī min h̾ze twang·
dc iſt ſvnder minē danc·
ah des bin ich gar vnfro·
doh ſol niht denkē·
das min ſtet̾ mv̊t·
mv́ge an ir wenkē·
ich han dc behůt·
wan ich han ſi ſelig wib·
lieb̾ dāne min ſelbes lib·

Sol ich froͤidelos belibē·
vō ir dú genade hât·
ſon wirt niem̾ ſoꝛgē rât·
an mir ſendē hinnēvůr·
ſo mv̊s ich die zit v̾tribē·
iemerlich ī ſender not·
beſſer w̾e mir ein tôt·
danne ob mich ir troſt vúrkúr·
ich han niht befvndē·
ſolher ſm̾zē me·
miſ h̾zen wundē·
die tůnt mir ſo we·
wā mih mīne ſchos alda·
da vō ſten ich iūger grâ·