Froͤit úch froͤit úch gruͤnú heide (Mit aufgelösten Abbreviaturen)
[52v]
Froͤit úch froͤit úch gruͤnú heide·
froͤit úch vogel froͤit úch gruͤner walt·
swas úch ie geschach zeleide·
dc tet uch der leide winter kalt·
dc habt ir wol vberwunden·
noch han ich niht trostes funden·
an der lieben dú mich twinget mit gewalt·
Do von erst ir liehten ǒgen·
lieplich sahen in dc herze min·
do wande ich des ane lǒgen·
dc ich solde wol getroͤstet sin·
von ir nv hat sis verkeret·
vnd hat mich so geleret·
dc ich weis was sorgen ist vnd sender pin·
Owe froͤideriches gruͤssen·
owe minneklicher roter mvnt·
wenne wiltv swere bvͤssen·
mir ich bin nach froͤiden vngesvnt·
von der lieben die ich da minne·
nv ist sis doch min kúniginne·
swie si hat dc sende herze min verwunt·
Minnekliches vmbevahen·
dc tv̊t von den reinen wiben wol·
swem si went mit kússen nahen·
was der ganzer stete haben sol·
gegen der wunne ich geliche·
swem ein wib genedekliche·
froͤide git des herze ist ganzer froͤide vol·
Svͤsse minne twing die heren·
dc si erkenne minen senden pin·
dv solt ir gemvͤte seren·
sam dv hast getan dc herze min·
wirt ir kvnt din minnetwingen·
so mv̊s si mir sorge ringen
darnach kvrzer stvnde wil ich froͤlich sin·