Froͤit úch eregernden leien

Froͤit úch eregernden leien·
gegen den wunnebernden meien·
der die liehten heide hat
in manige wis bekleidet·
dc vil stolze walt gesinde·
singet aber vf der linde·
schowent wie der anger stat·
der winter hinnan scheidet·
der vogelin truren sich ze froͤiden keret·
die der winter húre storte·
dc man niht ir singen horte·
die hant froͤiden vollen rat·
ir sang sich aber meret·

Werende not in herzeleide·
treit min herze an vnderscheide·
vngenade dú hat mich
enpfangen zeingesinde·
minne disen kvmber wende·
rat das si mir helfe sende·
dc si bas bedenke sich
gegen mir dú minnekliche·
dc si giht nein dc wort mir truren meret·
dc si ia niht gegen mir sprichet·
wie dc froͤide mir zerbrichet·
ia ist si neines al zerich
swer si dc gegen mir leret·

Niemer tag ich den gediene·
ia dc holte ich mir^{[WS 1]} zewiene·
ich holte mirs^{[WS 2]} in vngerlant·
dc sis mit willen tete·
swa mir von ir rotem mvnde·
ia der froͤidebernden stvnde·
wurde froͤide noch bekant·
an neine^{[WS 3]} mit gerête·
ir horte ich ia mir mvͤste sorge entwichen·
nein mir froͤide wil vertriben·
minne sit dv gůten wiben·
bist zedienste wol bewant·
râte is der minneklichen·

Anmerkungen (Wikisource)

1. Vorlage: ir.
2. Vorlage: irs.
3. Vorlage: eine.