Froͤit úch beide ivnge vnd alt

Froͤit úch beide ivnge vnd alt·
winter kalt·
hinnen ist gescheiden·
schǒwent an den walt·
velt vnd anger stet bekleit·
blv̊men breit·
siht man vf den heiden·
dc ist mir geseit·
blv̊men wis·
dvr gruͤniv ris·
brehent vnd smiêrent
úch zierent·
ir ivngen niht ane vlis·

Da bi hoͤrt man vogel sanc·
svnder wanc·
klingen in der ǒwe·
die der winter twanc·
ir gemvͤte stet vil ho·
rehte also·
were mir ob min frǒwe·
mich noch tete fro·
dú mir ie
ze herzen hie·
nahe lac verborgen·
von sorgen·
geschiet ir trost mich noch nie·

Von ir dvlde ich vngemach·
manig ach·
fuͤget mir dú reine
dest min froͤide swach·
seht dc mv̊s verdulden ich·
zúhteklich·
wan si ist wandels eine·
dabi minneklich·
wol gestalt·
vnd niht ze balt·
ist min troͤsterinne·
mine sinne·
si zuket mir mit gewalt·

Der vil svͤssen mv́ndel rot·
mir den tot·
fuͤget vnd smerzen
ǒwe sender not·
sol der klagelicher pin·
wesen min·
froͤide minen herzen
mv̊s vnmere sin·
minen lib·
si selig wib·
hat vil gar betwungen·
verdrungen·
hat froͤide von mir ir lib·

Min vil sendes herze klaget·
gar verzagt·
dc ich der vnmere
dú mir wol behagt·
sol der vngemeine strit·
lengú zit·
wern vil sende swere
mich dem tode git·
wer ich ir
lieb als si mir·
leit mir gar verswunde·
trost fvnde
min herze nach siner gir·