Froͤiden bilde vnd ir geberde

Froͤiden bilde vnd ir geberde
froͤiden schin treit usserthalb der welte or min lib·
da bi ringet mit beswerde
tǒgen innerthalb das herze duch ein selig wib·
von der vngenade ich vinde·
mit wan werndes leides pin·
so bin ich der welt gesinde·
der tůn ich min froͤide schin·
vnd ie doch mit der geverde·
das das herze duldet leit der froͤiden wider kib·

Svs můs ich mich froͤiden twingen·
dur der welte liebe·
doch ist solchú froͤide ein nicht·
dv́ mit so verdachten dingen
vnd mit trugelisten nach der welte gunst geschicht|
so der lib der welte lachet·
so ist es vmb das herze also·
das es in den^{[WS 1]} sorgen krachet·
soͤlcher froͤide bin ich vro·
moͤcht ich trost von liebe erringen·
so hette ich mit beiden wârer gantzer froͤiden pflicht·

Welt nv lach mich des geniessen·
das ich diner froͤiden ie leiter vnd venre ie was·
vnd solt mir mit wunsch erschiessen·
vnd mir worten gegen der lieben der ich nie vergas·
das si mir von sêndem leide·
minen ungetrosten můt·
dvrch ir svͤssen guͤte scheide·
welt ob si das dvrch dich tůt·
so wil ich dir erst vf sliessen
froͤiden hort das dv von mir nie wurde erfroͤiet bas·

Anmerkungen (Wikisource)

1. Vorlage: in den.