Es taget vnmassen schone

Es taget vnmassen schone·
dú naht mv̊s ab ir throne·
den si ze kriechen hilt mit ganzer vrone·
der tag wil in besitzen nv
der tribet ab ir vesten·
die naht mit siner glesten·
dest war si mag niht langer da geresten·
wan es ist zit vnd niht zefrů·
dc man ein scheiden werbe·
svs sang der wahter e dc sich geverbe·
der tag mit siner roͤte·
wol vf wol vf ich gan iv niht zebeliben bi der noͤte·
ich fúrhte dc der mine ir teil verderbe·

Das horte in tǒgenr schǒwe·
ein ern riche frǒwe·
vnd ǒch ir minnen dieb der durh ein ǒwe·
was ritterlichen dar bekomen·
si sprah frúnt miner wunnen·
der wahter wil niht gvnnen·
vns liebes wan er wolte sin bespvnnen·
mit miete dc ich han vernomen·
es ist dem tage vnnahen·
si stv̊nt vf vnd begvnde gahen·
hin zv̊ den wahter eine·
si sprah wahter nim silber golt vnd edel rich gesteine·
la mich den zarten lieben vmbevahen·

Er sprach ich bin gemietet·
get wider vnd nietet·
úch froͤiden wan ich wolte dc ir berietet·
mich das habt ir vf ende braht·
ich warne úch swenne es zitet·
dc er mit froͤiden ritet·
swenne ich úch sage so huͤtet dc ir iht bitet·
ir lât in dar er habe gedaht·
si wart sa vmbeuangen·
er kuste ir roten munt ir klaren wangen·
dc was der minne lehen·
lib vnd lust die liessen sich do wenig ieman flehen·
da dc ergieng da ist ǒch me ergangen·