Es ist reht dc ich lasse den mv̊t

Es ist reht dc ich lasse den mv̊t·
der mir vf minne ie wc riche vnd gůt·
ich wil gebaren als es nu stat·
owe das minne ie dc boͤse ende hat·
swer sich mit stete an ir vnstete lat·
wie vnsanfte dem ein scheiden tůt·
als es mir hat dc selbe getan·
liebe mv̊s dike mit leide zergan·
wie sanft im ist der sich hat behůt·

Nv werdent ǒgen vil truͤbe vnd rot·
nach liebem frúnde so lident si not·
die ir da beitent lihte iemer me·
dc leit getůt maniger frowen nv we·
die froͤide enpflagen mit liebe als e^{[WS 1]}·
der wunne wendet nv maniger den tot·
minne vnd frúnde ich dvr got lassen wil·
des dunket mich dvr in niemer zevil·
sit man vns von ime dienest gebot·

Min teil der minne dc svlt ir úch han·
dc en wil ich anders niemanne lan·
da bi svlt ir herre gedenken min·
het ich iht liebers dc solt úwer sin^{[WS 2]}·
froͤide vnd wunne werde von ir schin·
si hat mir niwan leit noch getan·
sit ich mich kerte vnd ie sere rang·
an eine stat da mir leider nie gelang·
bc danne mir mvͤze es ǒch da mitte ergan·

Das ir genade mich so gar vergie·
des bin ich vro vnd klagetez doch ie·
ir edeler minne ich noh sanfter enbir·
danne ich si weste in den sorgen nach mir·
als ich nv han vnd lide nach ir·
got vnser herre dvr den ich si lie·
der gvnne mir des werde iemer ein wib·
der vf genade dienen svle min lib·
dc es dv́ si dú mich erste vie·

Anmerkungen (Wikisource)

1. Vorlage: alſe.
2. Vorlage: úwer.