Er ist gewaltig vnd stark

Er ist gewaltig vnd stark·
der zewihennaht geborn wart·
dc ist der heilige krist·
ia lobt in alles dc dir ist·
niwan der tieuel eine·
dur sinen grossen vbermv̊t
so wart im dú helle zeteile·

IN der helle ist michel vnrat·
swer da heimvͤte hat·
dú svnne schinet nie so lieht·
der mane hilfet in nieht·
noh der liehte sterne·
ia mvͤt in alles dc er siht·
ia werer da zehimel also gerne·

IN himelrich ein hvs stat·
ein gvldin weg dar in gat·
die sv́le die sint marmelin·
die zieret vnser trehtin·
mit edelem gesteine·
da kvmpt nieman in·
ern si vor allen sv́nden also reine·

Swer gerne zv̊ der kirchen gat·
vnd ane nît da stat·
der mag wol froͤlichen leben·
dem engel gemeine·
wol im dc er ie geborn wart
zehimel ist dc leben also reine·

Ich han gedienet lange·
leider einem manne·
der in der helle vmbe gat·
der brvͤuet mine missetat·
sin lone der ist boͤse·
hilf mir heiliger geist·
dc ich mich von siner vancnisse erloͤse·

Mich hungerte harte·
ich steig in einen garten·
da wc obez innen·
des moht ich niht gewinnen·
dc kom von vnheile·
dike wegt ich den ast·
mir wart des obeses nie niht zeteile·

Swa ein gůt bǒm stat·
vnd zweier hande obes hat·
beide svͤz vnd svr·
so sprichet ein sin nah gebvr·
wir svln dc obez teilen·
wirt ir eines drvnder vul·
es bringet vns dc ander zeleide·

Swel man ein gv̊t wib hat·
vn zeiner ander gat·
der bezeichent dc swin·
wie moͤht es iemer erger sin·
es lat den lutern brvnnen·
vnd leit sich in den truͤben pfůl·
den sitte hat vil manig man gewunnen·

Ein man sol haben ere·
vnd sol ie doh der sele·
vnder wilen wesen gv̊t·
dc in dehein sin vbermv̊t·
verleite niht zeverre·
swenne er vrlobes ger·
dc es im an dem wege niht enwerre·

Korn sêt ein bvman·
do enwolde es niht vf gan·
im erzornte dc·
ein ander iar er sich vermas·
dc ers en egerde lieze·
er solde es im gvͤtlich geben
der dem andern vmb sinen dienst iht gehieze·

Crist sich zemarterenne gab·
er lie sich legen in ein grab·
dc tet er dvr die gotheit·
da mit lôste er die kristenheit·
von der heizen helle·
er getůt es niemermer
dar an gedenke swer so der welle·

An dem osterlichen tage·
do stůnt sich crist von dem grabe·
kúnig aller keiser·
vater aller weisen·
sine hantgetat er loste
in die helle schein ein lieht
do kom er sinen kinden zetroste·

Wurze des waldes·
vnd erze des goldes·
vnd ellú abgrúnde·
dú sint dir herre kv́nde·
dú stent in diner hende·
alles himelschliches her·
dc en moͤhte dich niht vol loben an ein ende·