Ein newes Christlichs Lied Dadurch Deudschland zur Busse vermanet
[6]
WAch auff / wach auff / du Deudsches land /
Du hast genug geschlaffen /
Bedenck was Gott an dich gewand /
Wozu er dich erschaffen /
Vnd dir vertrawt / sein höchstes pfand /
Drumb magstu wohl auffwachen.
Gott hat dich Deudschland hoch geehrt /
Mit seinem Wort der Gnaden /
Vnd hat dich lassen laden /
Zu seinem reich welchs Ewig ist /
Darzu du denn geladen bist /
Wil heilen deinen schaden.
Die Warheit vnd das Leben /
Sein liebes Euangelion /
Aus lauter gnad gegeben /
Denn Christus ist allein der Man /
Kein werck hilfft sunst darneben.
Du lagst zuuor im finstern gar /
Mit blindheit hart gekrencket /
Bey dir kein liecht der Warheit war /
Zur lügen vnd Abgötterey /
Falsch Gottesdiensts vnd heucheley /
Jns Teuffels Reich versenckt.
[7]
Du hast zuuor den Antichrist /
Vnd seine lügen / stanck / vnd mist /
Als Göttlich ding geehret /
Du gabst jm noch / als deinem Herrn /
Dein leib vnd gut auch willig gern /
Von solcher lügen falschem schein /
Hat Gott dein hertz getrennet /
Durch Luther den Propheten dein /
Gantz Deudschland solchs bekennet
Zu seinem reich gar Veterlich /
Wohl dem ders recht erkennet.
Fur solche gnad vnd güte gros /
Soltu Gott billich dancken /
Von seinem Wort nicht wancken /
Dich halten wie sein Wort dich lert /
Dadurch wird Gottes Reich gemehrt /
Geholffen auch den krancken.
So du rechtgleubig werest /
Jn lieb vnd trew / in scham vnd zucht /
Wie du solchs selbs begerest /
Jn Gottes furcht dich halten fein /
Das du niemand beschwerest.
Ob du solchs thust / das ist am tag /
Darff nicht erweiset werden /
Es zeugt jtzt die gemeine klag /
Auch weil die Welt gestanden ist /
Noch nie gewest / solch tück vnd list /
Jn worten vnd geberden.
[8]
Es ist nicht auszusprechen mehr /
Die grausam Gottes lestrung schwer /
So jtzt in Deudschem Lande /
Solch Sünde ist so hoch gebracht /
Das auch dafür der Himel kracht /
Gott hat sein Wort gegeben drumb /
Das wir vns zu jm wenden /
So kert Deudschland das bletlein vmb /
Thut seinen namen schenden /
All Sünde schwebt jtzt hoch empor /
Drumb wird Gott straffen senden.
Der Wucher / Geitz / betriegerey /
Wird jtzt für kunst gelobet /
Wird auch noch wol begabet /
Falsch tück vnd list / vorreterey /
Vntrew / Falscheit / gros büberey /
Jr viel jtzt hoch erhebet.
Jn mutwil frech gewenet /
Das sie in schalckheit so verschmitzt /
Was ehrlich ist / verhönet /
Jr kleidung mus fein bübisch sein /
Mit zirligkeit beschonet.
Wer jtzt nicht Pluderhosen hat /
Die schir zur erden hangen /
Mit zotten wie des Teuffels wat[WS 2] /
Es ist solchs so eine schnöde tracht /
Der Teuffel hats gewis erdacht /
Wird selbs sein also gangen.
[9]
Denn welcher Christ solch kleidt anblickt /
Sein hertz fur Gottes zorn erschrickt /
Wird bey jm selbs offt sagen /
Ach Gott / Deudschland das dringet dich /
Das du must straffen hertiglich /
All stendt sind jtzt so gar verterbt /
Wil niemand sich erkennen /
Mit gutem schein / doch so geferbt /
Thun all sich Christen nennen /
Zur Sünd gebraucht so vngehewr /
Deudschland wird sich abrennen.
Was vormals vnrecht / sünd vnd schand /
Das thut man jtzt gut preisen /
Das heist man jtzt hart eisen /
All ding han sich so gar verkert /
Vnrecht hat sich sehr hoch gemehrt /
Solchs thut die that erweisen
Wil niemand warheit hören /
Die lügen wird gar fein geschmückt /
Man hilfft jr offt mit schweren /
Dadurch wird Gottes Wort veracht /
Die lügen thut man ehren.
Dieweil denn Deudschland gar nicht wil /
An Gottes Wort sich keren /
Vnd heufft der Sünden teglich viel /
So wird auch Gott / ein scharffe Ruth /
Viel straffen senden wie ein flut /
Vnd Deudschland mores leren.
[10]
Wer augen hett / vnd sehen künd /
Am Himel / Erden / Lufft vnd Wind /
Die Gottes straffe rüren /
Viel zeichen lest geschehen Gott /
Vorwar Er was im sinne hat /
Martinus Luther Gottes man /
Hat Deudschland offt vormanet /
Man solt von Sünden abelan /
Ein grosse straff jm anet /
Den vndanck an seim gnaden Wort /
Keins vndancks Gott nicht schonet.
Wach auff Deudschland / ist hohe zeit /
Du wirst sonst vbereilet /
Ob sichs gleich jtzt verweilet
Vorwar die Axt ist angesetzt /
Vnd auch zum hieb sehr scharff gewetzt /
Was gilts ob sie dein fehlet.
Das zeugen seine zeichen /
Denn Gottes straff ist für der thür /
Deudschland las dich erweichen /
Thu rechte busse in der zeit /
Vnd thut sein hand dir reichen.
Das helffe Gott vns allen gleich /
Das wir von Sünden lassen /
Vnd führe vns zu seinem reich /
HErr Jhesu Christe hilff vns nhu /
Vnd gib vns deinen geist darzu /
Das wir dein warnung fassen.
[11]
O Gott gib das der Name dein /
Von deinem Wort vnd Lehre rein /
Nicht werden abgewendet /
Dein wille dempff all menschen tant /
So von der Warheit abgewend /
Amen spricht der dies liedt gemacht /
Gott tröste die nott leiden /
Vnd stürtze bald der lügen pracht /
So warheit stets thut neiden /
Sterck vnsern glauben Jhesu Christ /
Wenn wir von hinnen scheiden.