EIn selig wib mit vil wiblicher guͤte

EIn selig wib mit vil wiblicher guͤte·
gv̊t vnd reine vil schoͤne vnd here·
die erwelte min herze vnd erkos min gemvͤte^{[WS 1]}·
dc ich mit trúwen ir diene iemer mêre·
nv tǒgt min dienst min stete min trúwe alse kleine·
dc ich die not in dem herzen beweine·

Sin wil bekennen noh wissen die swere·
wie mich ir gvͤte an den sinnen berǒbet·
rich vnd selig an froͤiden ich were·
wan dc ir froͤmde mich froͤiden berǒbet·
dc meht ein lachen ein bliken ein frúntliches gruͤzen·
min sende swere vil sanfte gebuͤssen·

Ob ich si hasse dú min herze twingent·
nein es verbútet dú minne vil sere·
von der mir sorge vnd kvmber entspringet·
die mv̊s ich minnen ie langer ie mere·
mir ist dú liebe dú gv̊te dú schoͤne ane lǒgen·
lieb in dem herzen vil senfte in den ǒgen·

Fv́r alle die wunne vúr alle die ere·
fúr alle die froͤde des froͤlichen meien·
gert ich mir selben gelingen niht mere·
wan mit der lieben ein liepliches zweien·
wa wart ie meie so svͤze so gv̊t vúr die swere·
was froͤide blůmen zebrechen da were·

So riches wúnschen so hoher gedinge·
so wol gedenken das froͤit mich vil sere·
dc ist an froͤiden min hoͤhste gelinge·
das min gedanke mich machent so here·
dc ich dem keiser an froͤiden niht fůs wolde entwichen·
swenne ich gedenke an die vil minneclichen·

Wol im dem sin lieb zeliebe ergat·
mich hat herzelieb in herze swere braht·
dú vil liebe an der min froͤide stat·
dú hat anders niht wan leides mir gedaht·
lieb vnd leide· habent beide· pfliht vf minen schaden·
owe leider· ich bin beider· vberladen·

Swer nah liebe schoͤne werben kan·
we war vmbe wirt der liebes niht gewert·
da gechiht vnbilde vnd wunder an·
sit er herzeliebes schone vnd eben gert·
sol verderben· rehtes werben· vnd vnrehtes niht·
we den wiben· von der liben· dc geschiht·

Sit dú minne sinne blenden kan·
dc bekenne ich wol min sin ist zeblint·
dú vil liebe lat mich da niht an·
des bin ich vor liebe tvmb als ein kint·
sin wil enden noh erwenden· sende sorge an mir·
ich mv̊s sterben· ald erwerben heil an ir·

Ich stirbe an dien besten froͤiden min·
sin enscheide von dem herzeleide mich·
sol dú not niht wol ein sterben sin·
wc koͤnde an dem tot der not gelichen sich·
nv behvͤte dur ir gvͤte· mich vor dirre not·
dú so noͤtet· vnd toͤtet· als der tot·

Si ist mir alzelieb dc ist ein not·
div mich hasset al zesere manigú zit·
wirt es mere owe dc ist der tot·
mag ich tvmber lazen niht den tvmben strit·
nein ich niemer· ich wil iemer· ir genaden gern·
vnd vndulde dur ir hulde gar enbern·

Anmerkungen (Wikisource)

1. Vorlage: gemvͤ.