Dv́ vil liebú ſumer zit

Dv́ vil liebú ſumer zit·
hat gelaſſen gar den ſtrit·
dē vngeſlahtē wīt̾ lang·
ach ach kleinú vogellin·
mv̊ſſē iarlang trurig ſin·
geſwigē iſt ir ſuͤſſer ſang·
dc klag ich ſo klage ich mine ſw̾e
die mir tůt ein dirne ſeldēb̾e·
dc ſi mich niht zú zir vf dē ſtroͤſak lat·
dc ſi mich niht zů zir vf dē ſtrǒſag lat·
vn̄ das ſi mirs doh geheiſſē hat·

Min̾ ſw̾e der iſt vil·
iſt das mir niht helfē wil·
ein mīnēklichu dien̾in·
ſoſt mī kvmber manigvalt·
armv̊t vn̄ der wint̾ kalt·
die went mir iarlang heinlich ſin·
armv̊t hat mich an ir beſtē rate·
dar an nemt mich wiſe lúte ſpate·
da vō wil ſi mich niht vf ir ſtrǒſak lan·
da vō wil ſi mich niht vf ir ſtroͤſak lan·
vn̄ en han ir anders niht getan·

Frúnt ich han ú niht getan·
ſwas ich ú geheiſſē hā·
des mag ich úch vil wol gewern·
ir gehieſſēt mir eī lin·
zwene ſchůhe vn̄ einē ſchꝛin·
deſ wil ich vō ú niht enb̾n·
wirt mir dc ſo wēde ich úw̾ ſw̾e·
ſwē dc leit iſt daſt mir alſe mere·
ſo wil ich úch zv̊ mir vf den ſtrǒſak lan·
ſo wil ich úch zů mir vf dē ſtrǒſac lan·
ſo mag er wol wiegelonde gan·

Herze trut min kúnigin·
ſag an lieb was ſol der ſchꝛī·
wilt dv ein ſalt̾ vꝛowe weſē·
lieſſeſt dv die gabe an mich·
ich kǒfte etſwaſ vb̾ dich·
wie wilt dē wint̾ dv geneſē·
dv maht dich voꝛ armv̊t niht bedeken·
wā din gult̾ iſt vō altē ſekē·
da wil ich dē ſtrǒſak ī die ſtubē tragē·
da wil ich dē ſtrǒſak ī die ſtubē tragē·
ſo mv̊s oven vn̄ bꝛugge erwagē·

Nv lan ich úchſ alles wegē·
iſt dc wir vns zemē legē·
ſo ſint ir gewaltig min·
doh wil ich ê min geheis^{[WS 1]}·
bi mir habē gotteweiſ·
wā es mag niem̾ ê· geſin·
ſeht ſo nemt mih dāne bi dē beine·
ir ſvnt niht erwīden ob ich weine·
ir ſūt froͤlich zv̊ mir vf den ſtrǒſak varn·
ir ſvnt froͤlich zv̊ mir vf dē ſtrǒſak varn·
ſo bit ich úch mich vil lúzel ſparn·

Anmerkungen (Wikisource)

1. Vorlage: geheheis.