Doꝛt kvmt ein ſinneloſe ſamnvnge

Doꝛt kvmt ein ſinneloſe ſamnvnge·
der ſint wol zwelfe als ich iv die nv zelle·
her hebeſtrit von hohen vels der ivnge·
amerolt vn̄ Jſink ſin geſelle·
Jſater vn̄ engelwart der lange·
vte vn̄ otte vn̄ iſenbart·
iſenbolt vn̄ irrebart·
die irrēt mich an minem anevange·
ſi iſt mit lieber danne ich ir·
lieb iſt dú liebe mir·

Si vꝛagent wer ſi ſi dú ſelderiche·
der ich ſo hofeliche han geſvngen·
ſi wōt in tútſchen landē ſicherliche·
dc ſage ich den alten vn̄ den ivngen·
ſi iſt in einem creiſſe der ich diene·
von dem pfade vf den ſant
von elſâſſe in vngerlant·
in der enge ich ſi vant·
ſi iſt noch zwiſchen paris vn̄ wiene·
ſi iſt mit lieber danne ich ir·
lieb iſt dú liebe mir·^{[WS 1]}

Ich weis einen der ſich nv des vlîſſet·
das er mich beſwere an engelgarte
in weis niht wc er der lieben wîſſet·
im geſchiht liht als iſenbarte·
den ſin mv̊ter mit der pfannen ſchalke·
ſere an ſine ſtirnen ſlv̊g·
dc man in von dannen trůg·
des er ſelten ie gewůg·
da voꝛ hvͤte ſich der meiger valke·
Si iſt mit lieber danne ich ir·
lieb iſt dú liebe mir·^{[WS 2]}

Anmerkungen (Wikisource)

1. Vorlage: Lieb iſt dv́·
2. Vorlage: Si iſt mir lieb̾·