Dise liehten tage

Dise liehten tage·
sint vns komen vnd des meien zit
vil kleinen vogel sang·
swer verholne trage·
herzeliebe gegen der frowen sin·
der froͤwe sich vnd habe dank·
froͤide hete ich gerne wolde ein wib·
nach der ie min herze rang·
dv́ wil verderben mir den lib·

Wen ir senften sitte
mich verderben vnd ir mvnt so rot·
ir hohes lob ir werdekeit·
da ist ir sanfte mitte·
swie si mich verseret in den tot·
mit senelicher arebeit·
svnder wapen bin ich sere wunt·
sit dc in min herze sneit·
ir rosevarwer roter mvnt·

Hat si senfte sitte·
der enwart ich an ir nie gewar·
dú mich alsus verderben lat·
si tů des ich si bitte·
so belibe ich aller froͤiden bar·
min trost an ir genaden stat·
ich bin in ir vngenade komen·
herze mv̊t vnd al die sinne·
hat si alleine mir^{[WS 1]} benomen·

Si hat in den tot·
mich verseret svnder mine dank·
da ich mich gůtes zir versach·
dast ein sendú not·
wirt min vnuerdientú klage zelang·
sich herze do wc dir zegach·
das dv mir mit dienste ie riete dar·
des habe ǒch den vngemach·
den ich nv lide minú iar·

Singen wolde ich lan·
wan dc mih der vngemv̊ten has·
verderben wil dc tůt mir we·
dc mag vnder stan·
mit ir gvͤte des ich nie vergas·
dú wil dc ich ir singe mê·
nv wil ich dir singen frowe min·
vnd den wolgemv̊ten ê·
dc si dich iemer lobende sin·

Anmerkungen (Wikisource)

1. Vorlage: mr.