Des tages do ich dc krúze nam (Mit originalen Lettern)
[103r]
Des tages do ich dc krúze nam·
do hůte ich der gedankē min·
als es dem zeichen wol gezam·
vn̄ als ein rehter bilgerin·
do wande ich ſie ze gotte alſo beſteten·
dc ſi iemer fůs vs ſime dienſte mer getreten·
nv wellent ſi aber ir willē han· vn̄ ledekliche varn als ê·
dú ſoꝛge dú iſt min eines niet· ſi tůt ǒch mere livtē we·
Noch fuͤre ich aller dinge wol·
wan dc gedanke wellent toben·
dē gote dē ich da dienē ſol·
den enhelſent ſi mir niht so loben·
als ichs bedoꝛfte vn̄ es min ſelde w̾e·
ſi wellent noch alles wider· an dú altē mere·
vn̄ wen dc ich noch froͤide pflege als ich ir eteſwenne pflac·
dc wende mv̊ter vnde maget ſit ichs in niht v̾bietē mac·
Gedankē nv wil ich niemer gar·
v̾bieten des ir eigē lant·
in erlǒbe in eteſwēne dar·
vn̄ aber wider ſa ze hant·
ſo ſi [103v] vnſer beider frúnde doꝛt gegruͤſſen·
ſo kerē dan vn̄ helfen mir die ſv́nde buͤſſen·
vn̄ ſi in alles dc v̾geben· ſwaſ ſi mir habē her getan·
doch fúrhte ich ir betrǒgenheit dc ſi mich dike noch beſtan·
So wol dir froͤide vn̄ wol im ſi·
der din ein teil gewinnē mac·
ſwie gar ich din ſi woꝛdē fri·
doch ſach ich eteſwenne dē tac·
dc dv uber naht ī miner pflege were·
des han ich aber v̾geſſen nv mit maniger ſwere·
die ſtige ſint mir abe getrettē· die mich da leiten hin an dich·
mirn hulfe niemē wid̾ ze wege ern hête minē dieneſt vn̄ ǒch mich·